Сэтинньи 11 күнүгэр Кызыл куоракка Тыва Өрөспүүбүлүкэтин бырабыыталыстыбатын иһинэн Тыва гуманитарнай уонна прикладной чинчийиилэрин институтугар тыва биллиилээх учуонайдара мустан, Саха Сириттэн Ил Түмэн бастакы вице-спикерэ, историческай наука кандидата Александр Жирков салайыытынан тиийбит саха учуонайдарын кытта көрүстүлэр. Ону тэҥинэн, көрсүһүүгэ кыттыыны ыллылар Тыва Өрөспүүбүлүкэтин Улуу Хуралын Бэрэссэдээтэлэ Кан-оол Тимурович Даваа, Тыва Өрөспүүбүлүкэтин бырабыыталыстыбатын иһинэн Тыва гуманитарнай уонна прикладной чинчийиилэрин институтун дириэктэрэ Вячеслав Донгакович Март-оол, Тыва Өрөспүүбүлүкэтин Национальнай архыыбын дириэктэрэ Белекмаа Владимировна Мунге, Алдан Маадыр аатынан Тыва Өрөспүүбүлүкэтин Национальнай түмэлин дириэктэрин наукаҕа солбуйааччыта Светлана Сергеевна Тулуш, Тыва Өрөспүүбүлүкэтин А.С. Пушкин аатынан Национальнай бибилэтиэкэтин дириэктэрин наукаҕа уонна инновацияҕа солбуйааччыта Айланмаа Кызыл-ооловна Аракчаа, элбэх ахсааннаах Кызыл куорат наука, үөрэх ситимин научнай үлэһиттэрэ.
Тыва Өрөспүүбүлүкэтин Бырабыыталыстыбатын иһинэн Тыва гуманитарнай уонна прикладной чинчийиилэрин институтун салайааччыта Вячеслав Март-оол институт үлэтин сүрүн хайысхаларын, ситиһиилэрин, научнай чинчийиилэр туһунан ыалдьыттары билиһиннэрдэ.
М.К. Аммосов аатынан Хотугулуу-Илиҥҥи федеральнай университет профессора, филологическай наука доктора Василий Илларионов университет фольклор хайысхатыгар туох үлэни ыытарын уонна кэскиллээх барылларын туһунан дириҥ ис хоһоонноох иһитиннэрии оҥордо. Кини фольклору үөрэтии, чуолаан национальнай өрөспүүбүлүкэлэргэ, билинҥи кэмҥэ биир сүрүн сорукпут диэн этиитин мустубут дьон биһирээтилэр.
Ил Түмэн бастакы вице-спикерэ Александр Жирков дьокутааттар наука эйгэтэ сайдарыгар хайдах көмө оҥоруохтаахтарын туһунан бэйэтин санааларын үллэһиннэ уонна тыва норуотун биир улуу «Хунан-Кара» эпоһын саха омук тылыгар тылбаастыырыгар сүҥкэн уонна быһаарыылаах көмөнү оҥорбут, Тыва Өрөспүүбүлүкэтин бырабыыталыстыбатын иһинэн Тыва гуманитарнай уонна прикладной чинчийиилэрин институт фольклорун секторын сэбиэдиссэйигэр, педагогическай наука кандидатыгар Маргарита Кунгааҕа, биллиилээх фольклорист-учуонай, философия билимин доктора Светлана Орус-оолга барҕа махталын биллэрдэ.
Көрсүһүү сүрүн түмүгүнэн М.К. Аммосов аатынан ХИФУ уонна Тыва Өрөспүүбүлүкэтин бырабыыталыстыбатын иһинэн Тыва гуманитарнай уонна прикладной чинчийиилэрин института бииргэ үлэлээһин туһунан Сөбүлэһиигэ илии баттаһыылара буолла. Бу Сөбүлэһии чэрчитинэн гуманитарнай наукаларга, ол иһигэр саха уонна тыва омук эпическэй айымньыларын хардарыта тылбаастааһын уонна наука эйгэтигэр үлэлиир эдэр көлүөнэ иитиитин боппуруостара бигэргэннилэр.
-
0
-
0
-
0
-
0
-
0
-
0
