Көрсүһүүгэ Ил Түмэн уонна Улуу Хурал салайааччылара парламеннар икки ардыларыгар бииргэ үлэлээһин туһунан Сөбүлэһии барылламмыт тэрээһиннэрин олоххо киириитэ балай эмэ тэтимнээхтик баран иһэрин бэлиэтээтилэр. Кинилэр тыва норуотун биир бастыҥ эпическэй айымньыта «Хунан-Кара» саха омук тылынан бэчээттэнэн күн сирин көрбүтэ бу Сөбүлэһии тэрээһиннэрин саҥа таһымҥа таһаарда уонна бырааттыы омуктар чугас доҕордуу сыһыаннара салгыы бөҕөргүүрүгэр олук буолла диэн санааларын эттилэр.
Александр Николаевич Улуу Хурал Бэрэссэдээтэлэ Кан-оол Даваа Тыва Өрөспүүбүлүкэтиттэн бу бырайыак үлэтин сүрүннээччи быһыытынан олус үчүгэйдик тэрийбитин, иилээбитин-саҕалаабытын түмүгэр Арассыыйа норуоттарын култууратын нэһилиэстибэтин сылын тэрээһиннэрин иитинэн, кинигэ күн сирин көрбүтүн бэлиэтээн туран, Кан-оол Тимуровичка тус бэйэтигэр барҕа махтал тылларын эттэ.
Кан-оол Тимурович Сөбүлэһии чэрчитинэн аны саха олоҥхолоруттан бүгүҥҥү күҥҥэ ордук улаханнык биһирэммит уонна тарҕаммыт П.А. Ойуунускай «Дьулуруйар Ньургун Боотур» олоҥхото тыва омук тылыгар тылбаастаныахтааҕын санатта уонна бу хайысхаҕа үлэ 2019 сылтан саҕалаан хаамыытын, түмүктэнэн эрэрин сиһилии кэпсээтэ.
Санаттахха, кинигэ «Аан дойду норуоттарын эпостара» норуоттар икки ардыларынааҕы түмсүү вице-президенэ Александр Жирков көҕүлээһининэн, «Айар» Национальнай кинигэ кыһатын иһинэн олохтоммут «Аан дойду норуоттарын эпическэй айымньылара» сиэрийэнэн бэчээттэнэн таҕыста. Бу кинигэҕэ тыва «Хунан-Кара» эпоһа атын омук тылынан тылбааһын хас да көрүҥэ киирбитэ кэрэхсэбиллээх уонна олус ураты: бастакытынан, биллиилээх эпосовед филологическай наука доктора А.В. Кудияров тыва тылыттан нууччалыы тылбааһа, иккиһинэн, кини нууччалыы тылбааһыттан А.А. Борисова сахалыы тылбааһа уонна, үсүһүнэн, А.Н. Жирков нууччалыыттан буолбакка, фольклорист М.Б. Кунгаа оҥорбут баллыр тылбааһын көмөтүнэн, араас көрүҥнээх тылдьыттары туһанан тыва тылыттан быһаччы саха тылыгар тылбааһа. Бу олус сэдэх, сонун көстүү буолар диэн эпосоведтар, учуонайдар сыаналаатылар.
Түмүккэ Александр Жирков уонна Кан-оол Даваа Ил Түмэн уонна Улуу Хурал икки ардыларыгар бииргэ үлэлиир туһунан Сөбүлэһиилэрин салгыыр барылын дьүүллэстилэр, федеральнай уонна эрэгийиэннээҕи сокуоннары оҥорууга санааларын атастастылар.
-
0
-
0
-
0
-
0
-
0
-
0
