Эрэгийиэҥҥэ быраастар, сиэстэрэлэр, тыа сирин нэһилиэнньэлээх пууннарыгар провизордар тиийбэттэрин боппуруоһа сытыытык турар. Исписэлиистэр ыраах сытар оройуоннарга олохсуйа, үлэлии баралларыгар бэлэмэ суохтара билиннэ. Үлэ миэстэтин талан үлэлии баралларыгар ордук хамнас кээмэйиттэн тутулуктаах, ол иһигэр 500 тыһыынчаттан 2 мөл. солк. диэри биир кэмнээх харчынан төлөбүр анааһына буолар. Бу сыалга дьокутааттар төлөбүрү ааҕыыга, үлэлии барыахтаах сирэ төһө ыраах сытарыттан көрөн, үрдүк эбэтэр намыһах коэффициены олохтуурга этии киллэрэллэр. Оччотугар, ыраах сытар бөһүөлэктэргэ үлэлии барбыт исписэлиистэргэ, холобур, Кукаҥҥа эбэтэр Победаҕа тиийбиттэр 3 мөл. солк. диэри төлөбүр ылыахтарын сөп диэтилэр.
Ону таһынан тыа сиригэр көһөн барар эмчиттэргэ уонна мэдиссиинэ үлэһиттэригэр тэҥ усулуобуйаны тэрийэр сыалтан, Доруобуйаҕа харыстабылын министиэристибэтин бирикээһинэн бигэргэммит биир кэмнээх компенсационнай төлөбүрдэри ылар исписэлиистэр испииһэктэригэр эбии стамотолог, ортопед быраастары, мэдиссиинэ сиэстэрэтин, провизоры киллэрэри туруорсаллар.
Социальнай бэлиитикэ боппуруостарын кэмитиэтин бэрэссэдээтэлэ Ольга Ушакова бэлиэтээбитинэн, парламент дьокутааттара федеральнай таһымҥа суолталаах кыһалҕалары көтөҕөллөр, быһаарыылары уонна түмүктэри ситиһэллэр.
Ол курдук, саҥа үлэлии киирбит исписэлиистэргэ хамнастарын үрдэтэргэ, медико-диагностическай киини мэдиссиинэ тэрилтэлэрин испииһэктэригэр киллэрэр туһунан сокуон барылын дойду Доруобуйаҕа харыстабылын министиэристибэтэ өйөөтө. Бу тэрилтэлэргэ каадырынан хааччылыыга наадалаах үп-харчы боппуруостарын быһаарарга көмөлүөҕэ. Бу этиини атын кэккэ эрэгийиэннэр эмиэ өйөөбүттэрэ.
-
0
-
0
-
0
-
0
-
0
-
0
