Уопсастыба

Сэмэн Оготоев Амма ойуурун кэрдиини утарыыга ыытыллар үлэ туһунан кэпсээтэ. Ульяна Винокурова ыһыах кэмигэр ыаллыы судаарыстыбалар бэрэстэбиитэллэрин ыҥыран форум тэрийэр наадалааҕар тохтоото. Биллиилээх эколог Иван Бурцев экология музейын тутар наадалааҕын туһунан этии киллэрдэ. Мантан салгыы Иван Семенович врач Н.Н. Николаев «Ыраас айылҕа, чөл доруобуйа көмүскэлигэр» диэн 2021 сыллаахха 150 ахсаанынан тахсыбыт кинигэни элбэтэн хос таһаарыахха диэтэ. И. Бурцев үһүс этиитэ Мэҥэ Хаҥалас Абалааҕын эмтээх бадарааныгар үрдүттэн санаторий тутар наадатын туһунан буолла. Валерий Луковцев сүөһү иитиитин дотациятын бүгүҥҥү формата итэҕэстэрин ыйда.

Ыҥырыллыбыт ыалдьыт, Таатта бэрэстэбиитэлэ, Изабелла Сивцева АБЭ-ттан (СВО) кэлбит ыччаттар проблемаларыгар тохтоон ааһарыгар 1945 сыллаахха сайын Аҕа дойду сэриититтэн кэлбит дьону от үлэтэ өрүһүйбүтүн этэн туран, АБЭ-ттан кэлбит ыччаты төһө кыалларынан үлэнэн хааччыйар туһалаах диэтэ. Маны таһынан кини тыа сиригэр дьахтар төрөөһүнүн сыыппарата адьас киһи дьиксиниэн курдук түспүтүн сырдатта.

Дьон болҕомтотун Олоҥхо театрын артыыһа Дмитрий Иванов этиитэ тарта. Кини АБЭ-ҕа сылдьыбыт уолаттары реабилитациялааһын боппуруоһугар тохтоото: «Кыргыһыыга сылдьыбыт киһиэхэ илбис иҥэр. Онон дойдуларыгар кэлбит уолаттарга айылҕалаах дьонунан илбис өһүлэр сиэри-туому оҥорор буолуохха», - диэтэ. Кини: «АБЭ-ттан кэлбит бөлөҕү кытта айылҕалаах дьону көрүһүннэрэр сөп. Бу дьон тылларын-өстөрүн истэн баран саллаат бэйэтэ талан ылбыт киһитигэр илбис устуутун туомун оҥоттороро сөп», - диэтэ.

Биллиилээх геолог, уопсастыбаннай диэйэтэл Николай Кириллин бырамыысылыннастаах Мирнэй, Ленскэй, Нерюнгри курдук куораттарга саха эйгэтин тэрийиигэ үлэ сэниэлээхтик барбакка турарын бэлиэтээтэ.

Вилюяна Николаева «Ийэ тылын кэскилин» түмсүү чэрчитинэн төрөппүттэр кэмитиэттэрин ортотугар оҕону сахалыы иитии хайысхатыгар бастыҥ бырайыак куонкурус тэрийэн эрэллэрин кэпсээтэ.

Норуоднай депутат Павел Ксенофонтов И. Бурцев этиитигэр хоруйдаан «Н. Николаев кинигэтэ тахсарыгар көмөлөһүөм» диэтэ.

Мунньах кыттыылаахтара «кэмигэр тэриллибит наадалаах кэпсэтии буолла» диэн бэлиэтээтилэр. Улуус бэрэстэбиитэллэрэ маннык киэҥ ис хоһоонноох, аһаҕас кэпсэтиилэр улуустарга эмиэ буолалларыгар баҕаралларын эттилэр.