Вера Петровна бэрт сэргэх тэрээһини бэйэтэ иилээн-саҕалаан ыытта. Кини Яков Тыасытов олоҕун, айар үлэтин туһунан презентация бэлэмнээн, кэпсээтэ. “Аартык” литературнай түмсүүнү тэрийэр туһунан санааны лоп курдук уон сыл анараа чопчу Яков Тыасытов уонна Сергей Егоров тыл көтөхпүттэрин санатта. Билигин бу түмсүү бэлиэр 16 чилиэннээх. Кинилэр хас даҕаны кинигэлэрэ хомуурунньук буолан күн сирин көрбүттэрэ.
“Айар киин” Норуот айымньытын дьиэтин үлэһитэ Арылхан Мойтохонов саха эрэ барыта билэр “Дойдум дьоно” диэн Яков Тыасытов тылларыгар айыллыбыт ырыаны ыллаата. Эмиэ ити тэрилтэ үлэһитэ Анна Васильева маалыкайдар бары ахтар-саныыр бэйиэттэрин хоһоонун ааҕан иһитиннэрдэ.
“Аартык” түмсүү биир ханныбат иэйиилээх бэйиэтэ, отучча ырыа мелодиятын ааптара Саргылаана Стручкова Яков уонна убайа Юрий Тыасытов хоһоонноругар айбыт ырыаларын ыллаан иһитиннэрдэ.
Түмсүү чилиэннэрэ Вера Аммосова, Саргылаана Стручкова, аҕыс кинигэ ааптара уонна хос ааптара Вера Соловьева бэлэмнээбит толору астаах сандалыларын тула олорон Яков уонна Юрий Тыасытовтар олохторун, айар үлэлэрин туһунан кэпсэттилэр, кинилэр хоһооннорунан саҥа ырыалары сүрэхтиир, “Аартык” чилиэннэрин саҥа кинигэлэри таһаарар туһунан ирэ-хоро кэпсэтэн санааларын үллэһиннилэр. Ини-биилэр талааннара арылларыгар кинилэр учууталлара, эмиэ биир биллиилээх бэйиэппит, публициспыт Василий Кириллович Ксенофонтов улахан сабыдыаллааҕа ахтылынна.
Саргылаана Стручкова хоһооннорун, ырыаларын хомуурунньуктарын таһаарар былааннаах сылдьарын кэпсээтэ. Арылхан Мойтохонов кини Юрий Тыасытов тылларыгар “Дьиримнэс сулустар” диэн ырыатын саҥардан аранжировкалыах буолла. Вера Соловьева Бордоҥ нэһилиэгин олохтоохторо сир баайын хостооһуҥҥа үлэлэспиттэрин туһунан кинигэ бэлэмнээн эрэрин туһунан кэпсээтэ. Онуоха остуол утары олорор олохтоох түмэл дириэктэрэ, суруналыыс, суруйааччы Александр Ильин-Егоров көмөлөһөрүгэр көрдөстө.
Саҥа үүммүт сылга “Аартык” түмсүү уон сылыгар анаммыт олохтоохтор ыкса кыттыылаах тэрээһиннэр барыллара ырытылыннылар. Этэҥҥэ буоллахха, элбэх сэргэх суол ситиһиллиэх курдук буолла.
Лидия Ивановна түмсүбүт дьоҥҥо: “Кэргэммин Яковы иһирэхтик саныы сылдьар эбиккит”, – диэн истиҥ махтал тылларын эттэ. Онно даҕатан Яков Григорьевич хоһоонуттан быһа тардыыны аҕаларбын көҥүллээҥ:
Кэлин, уһун айан суойан,
Сылайбыттыы хаамыаҕым.
Элбэх дьикти сыллар ааһан,
Кырдьар кэмим тиийэн кэлиэ.
Баҕарабын ол кэмҥэ
Маннык ыраас суолланыахпын.
Ийэ сирбэр өр кэмҥэ
Сүппэт бэлиэ хаалларыахпын...
-
0
-
0
-
0
-
0
-
0
-
0
