Күрэхтэһии балаһыанньата эрдэ биллэриллибит буолан, алталыы киһилээх алта хамаанда: оҕо успуортка оскуолата, Кирбэй ыччатын хамаандата, улуустааҕы электростанция, баһаарынай чаас, улуус дьаһалтатын, Өлөөн орто оскуолатын улахан кылааска үөрэнэр уолаттарын хамаандата кытыннылар.
Көхтөөх үлэ түмүгүнэн, саамай элбэх мууһу ылбыт баһаарынай чаас хамаандата бастаата, 30 000 солк. бирииһи тутта. Иккис миэстэни Кирбэй ыччаттара ыланнар, 20000 солк. харчынан, үһүс миэстэҕэ электростанция хамаандата тиксэн, 10000 солк. харчынан бириэмийэлэннилэр.
Төрдүс миэстэни оҕо успуортка оскуолата, бэһис миэстэни улуус дьаһалтатын хамаандата, алтыс миэстэни оҕолор хамаандалара ыллылар. Оҕолор «Саамай эдэр кыттааччылар» анал ааты ылан, 3000 солк. харчынан бэлиэтэннилэр.
Баһаарынай чаас үлэһитэ Семен Иванов «Саастаах кыттааччы» диэн ааты ылан, 2 000 солк. биһирэбил бириис хаһаайына буолла. Күрэхтэһии усулуобуйатыгар барыта учуоттанар: чардаат киэҥэ-куоҥа, төһө муус эрбэммитэ, ылыллыбыта уонна биллэн турар үлэ хаачыстыбата. Барыта 65 тыһыыннча солкуобай сууммалаах харчынан бириис олохтоммут. Оҕолор төһө да төрдүө эрэ буолтарын иһин, 4 кубометр мууһу ыллылар, бу биир ыалы көҥүл хааччыйар.
– Күрэхтэһии кыттыылаахтара ылбыт муустарынан үлэ, тыыл бэтэрээннэрэ, кыаммат, инбэлиит, соҕотох олорор дьон, Анал байыаннай дьайыы кыттыылаахтарын дьиэ кэргэттэрэ хааччылыахтара. Билиҥҥи туругунан 70 сайаапка киирэн турар, өссө социальнай бэлитикэ салаатын кытары испииһэги көрөн олорон үлэлэһиэхпит, -- диэтэ Өлөөн нэһилиэгин баһылыга Николай Семенов.
«Норуот күүһэ – көмүөл күүһэ», эр дьон биир санааҕа түмүллэн, күүстэрин мунньан кыттыбыт үлэлэринэн саастаах дьоҥҥо көмөлөһөллөрө хайҕаллаах. Тэрийэр хамыыһыйа хамаандалары өйөөн, нэһилиэк баһылыга Николай Николаевич бэйэтин көҕүлээһининэн плов буһаран, олохтоох дьаһалта исписэлиистэрэ балаакка туруоран, итии чэйинэн маанылаатылар.
Николай Николаевич кыттыбыт хамаандаларга, нэһилиэк исписэлиистэригэр тэрийээччилэр ааттарыттан махталын биллэрдэ. Маннык тэрээһиннэргэ кыттар ыччаттарбытыгар, эр хоһууттарга махтал тыллара тиийдиннэр, ситиһиилээх үлэни, дьолу баҕарабын!
Хаартыска: Надежда Колодезникова.
-
0
-
0
-
0
-
0
-
0
-
0
