Соторутааҕыта Горнай улууһун дьокутааттарын Сэбиэтин бэрэссэдээтэлин солбуйааччы Анатолий Васильевич Люфа сибээскэ тахса сырытта. Кэпсэтиибит сүнньүнэн үйэлээх уот тула буолла.
Анатолий Люфа, "Горнай улууһа" МО Сэбиэтин дьокутаата:
- Билигин арҕаа дойдулар күөртээһиннэринэн дойдубутугар буола турар анал байыаннай эпэрээссийэ кэмигэр нэһилиэнньэҕэ патриотическай өйү-санааны уһугуннарар сыаллаах, улуус дьокутааттарын Сэбиэтин уочараттаах мунньаҕар Бэрдьигэстээххэ Кыайыы болуоссатыгар "Үйэлээх уот" туруоруутун туһунан боппуруос көтөхтүм.
Бу боппуруоһу мунньах бэбиэскэтигэр киллэттэрэрбэр ааспыт сыл ыам ыйыгар Дойду Бэрэсидьиэнэ Владимир Путин күөх төлөн ситимэ тардыллыбыт нэһилиэнньэлээх пууннарыгар үйэлээх уот туһаныллар ороскуота судаарыстыбаттан өйөнүллэр буолбутун туһунан сокуона төһүү буолла. Инники улуустааҕы гаас тэрилтэтин кытта кэпсэтиибэр, Кыайыы болуоссатыгар гаас ситимин тардарга бырайыак оҥоһуллубутун иһитиннэрбиттэрэ. Дьыала улуус өттүттэн гаас ситимин тардыытын үлэтигэр ороскуотун уйунуутугар турара. Инньэ гынан, улуус бүддьүөтүттэн сөптөөх үп-харчы көрүллэригэр этии киллэрбитим. Бырайыак үбүнэн хааччыйыытын үөрэтээри атын эрэгийиэннэр үлэлэрин кытта билсэн баран, үп-харчы суумата улуус бүддьүөтүн холугар кыаллар эбит диэн түмүккэ кэллим. Манна даҕатан эттэххэ, үйэлээх уот биһигини сомоҕолуур, ыччакка өрүү Улуу Кыайыыны санатар сүрүн бэлиэбит буолар. Боппуруос мунньах бэбиэскэтигэр киирэн, инникитин үлэ-хамнас барыбытын сомоҕолуо диэн эрэнэбин, - диэн кэпсээтэ.
Остуолбар саха норуодунай суруйааччыта Софрон Данилов "Санаам туймуулара" диэн кинигэтэ сытар. Манна "Умуллубат уот" диэн бэлиэтээһинигэр: "Ханнык да дойдуга, ханнык да былааска өлбүттэри кэриэстээһин - тыыннаахтар мүччүрүйбэт ытык иэстэрэ. Ким, туох туһугар күрэстэспититтэн тутулуга суох. ...Уһуктубат ууларыгар утуйа сытар, иннилэригэр-кэннилэригэр сырдык ыраларыттан ураты туохтара да суох сылдьыбыт барахсаттар "күрэстэһэн кыайдахха, кэрэ кэм кэлиэҕэ" диэн бигэтик эрэнэллэрэ. Ол тыыннарын толук биэрбит ыралара - норуот көҥүлэ, кини дьоло-соргута этэ", — диэн суруйан хаалларбыта биһиги, билиҥҥи көлүөнэ, бу санааны олоххо киллэрэр ытык иэспит буоларын өрүү саната турар.
Ол туоһутунан эдэр дьокутаат Анатолий Люфа бу боппуруоһу олоххо киллэрээри туруорсубута буолар. Хас гаас киирбит нэһилиэктэригэр, сэлиэнньэлэригэр үйэлээх уот умайан, инникитин үүнэр көлүөнэни патриотизм кэрэ иэйиитигэр угуйа, үөрэтэ турдун.
-
1
-
0
-
0
-
0
-
0
-
0
