Уопсастыба

Билиэт сыаната тоҕо итиччэ ыараабытын «Якутия» авиахампаанньа уонна СӨ Тырааныспарга, суол хаһаайыстыбатыгар министиэристибэ туох диэн быһаарбытын туһунан билиһиннэриэхпит. 

Сахабыт Сиригэр кэнники сылларга хас да ый тухары -55-59С тоһуттар тымныы туран, сайын ойуур баһаарын буруота саба бүрүйэн, сибиэһэй салгыҥҥа сылдьарбыт кэмнээх-кэрдиистээх буолла. Кыһыны супту күнү көрбөккө, сайын буруолаах салгынынан тыынан, киһи доруобуйата мөлтүүр. Аны хаста даҕаны COVID-19 ыалдьан баран чөлүгэр түһэ илик дьон элбэх. Сайын үтүөтүн билэ, соҕуруу сынньана, санаторийга эмтэнэ барарга итиччэ сыананы уйунарга хамнаһыҥ кырата 90 000 солк. буолуон наада. Онтон кыра хамнастаах дьон быыллаах, буруолаах куоракка хаалалларыгар тиийэллэр.

Эргийэн көтүү  

Байыаннай дьайыы биллэриллиэҕиттэн соҕуруу хайысхаларынан сөмөлүөттэр Сочига уонна Минеральные Воды эрэ көтөллөр. Анапа, Симферополь, Геленджик, Краснодар аэропуортара сабыллан тураллар. Онон Сочига тиийэн баран оптуобуһунан, эбэтэр поеһынан салгыы айанныыгын.

Дьокуускай аэропуордугар сөмөлүөт түһэр-көтөр балаһатын өрөмүөнүн тиһэх түһүмэҕэ саҕаламмытынан сибээстээн, балаһа уһуна кылгатылынна. Ол иһин ыам ыйын 15 күнүттэн Дьокуускай — Москва хайысхатынан «Якутия» уонна «S7» - «Сибиир» авиахампаанньа көтөллөр.

Онон элбэх киһини тиэйэр улахан ыйааһыннаах ааллар көтүүлэрэ хааччахтанан, рейсэ себестоимоһа үрдээн тахсар. Балаһаны муус устар 1 күнүттэн алтынньыга диэри өрөмүөннүөхтэрэ.

Ыам ыйыгар уонна бэс ыйыгар 1650 м. балаһаҕа Boeing 737-700 сөмөлүөттэр көтүөхтэрэ. Оттон бэс ыйыгар уонна балаҕан ыйыгар 1800 м. уһуннаах балаһаҕа Boeing 737-800 түһүөҕэ.

Москваҕа көтөр «Якутия» авиахампаанньа сөмөлүөттэрэ Нижневартовскай куоракка тохтоон, сапыраапкаланан ааһыахтара. Дойду киин куоратыгар дьону таһар S7 - «Сибиир» авиахампаанньа көтөр ааллара аара суолга Новосибирскайга, Иркутскайга тохтууллар.

Дьокуускайтан стыковочнай рейсэнэн муораҕа сынньана барар дьону итинник уһун-киэҥ, сылаалаах айан күүтэр. Соҕуруу барар рейсэлэр Украинаны эргийэн көтөллөр, ол иһин айан бириэмэтэ эмиэ уһаан биэрэр. Бу барыта билиэт сыаната эбиллэригэр сабыдыаллыыр.

Субсидия харчыта көрүллүбэтэх

Былырыын сайын Москваҕа диэри бара-кэлэ билиэт сыаната 60 000 солк. иһинэн этэ. Быйыл тарыып ыараабытын «Якутия» авиахампаанньа судаарыстыбаттан көрүллэр үбүлээһин кыччаабытынан уонна субсидия харчыта көрүллүбэтэҕинэн быһаарар.

«Арҕаа дойдулар биллэрбит сааҥсыйаларын уонна байыаннай дьайыы кэмигэр Арассыыйа салгын тырааныспарын хампаанньаларын өйүүр сыалтан 2022 с. судаарыстыба үп-харчы өттүнэн көмө оҥорбута. Ол иһин билиэт сыаната үрдээбэккэ турбута. 2023 с. РФ Бырабыыталыстыбата ити хайысханан үбүлээһин харчытын кыччатан, билиэт ырыынак сыанатынан атыыланар, сыана үрдүүрүн тутарга эбии үп көрүллүбэтэ.

Нэһилиэнньэ чэпчэтиинэн туһанар араҥатын Дьокуускай — Москва икки ардыгар субсидияламмыт билиэттэринэн хааччыйарга Росавиация «Якутия» авиахампаанньаҕа 2023 с. үбүлээһин харчытын ыыппата. Ол эрээри, дьон сырыыта аҕыйаабыт кэмигэр 8000 солк. билиэттэр атыыга баар этилэр», — диэн олохтоох авиахампаанньаҕа этэллэр.

Дьокуускай – Москва хайысхатынан чэпчэтиллибит билиэт сыаната 7000 солк. Субсидияламмыт билиэтинэн элбэх оҕолоох ыаллар, инбэлииттэр, 23 сааһыгар диэри эдэр ыччат, итиэннэ 55 аҕа саастаах дьахталлар, 60 –ын ааспыт эр дьон айанныыр кыахтаахтар.

Авиационнай уматык ыараан, арҕаа дойдулар биллэрбит сааҥсыйаларын кэнниттэн сөмөлүөт саппаас чааһын сыаната эбиллэн, сиргэ уонна аэронавигационнай хааччыйыы ороскуота үрдээн, авиахампаанньалар билиэт сыанатын хас да бүк үрдэттилэр.

«Тарыып кээмэйэ билиэт төһө атыыга барарыттан, рейсэ хайдах туоларыттан тутулуктаах. «Якутия» авиахампаанньа кэммиэрчэскэй тэрилтэ эрээри, социальнай эппиэтинэһи сүгэрин быһыытынан, экэниэмикэҕэ сигэнэн олохтоммут тарыыптан чэпчэки сыаналаах билиэттэри атыылыыр.

Москва-Сочи хайысхатынан сайыҥҥы ыйдарга 80-98% чэпчэки сыаналаах билиэт атыыга тахсар. Билиэт түргэнник атыыланан бүтэн иһэринэн сылыктаатахха, олохтоммут сыана дьон атыылаһар кыаҕыгар сөп түбэһэр», — диэн «Якутия» авиахампаанньа генеральнай дириэктэрэ Андрей Винокуров иһитиннэрдэ.

Чэпчэки сыаналаах билиэт бүппүт

Биллэн турар, билиэт сыаната багаастаах, багааһа суох, төннөрүллэр-төннөрүллүбэт диэн арахсар. Ол эрэн ыраах айанныыр киһи хайдах уларыттар таҥаһа суох барыай, төннөрүгэр дьонугар кэһиитэ суох кэлиэй?

Дьокуускай — Москва, Сочи хайысхатынан ыам ыйыттан атырдьах ыйа бүтүөр диэри чэпчэки сыаналаах билиэттэр өссө сайын кэлиэн иннинэ атыыланан бүппүттэр.

«Сайыҥҥы уоппуска кэмигэр чэпчэки сыаналаах билиэккэ өрөспүүбүлүкэ олохтоохторун үгүс-үтүмэн өттө наадыйарынан сибээстээн, ону таһынан, дойду киин куоратын кытта удамыр сыаналаах сырыыны хааччыйарга РФ Бырабыыталыстыбатыгар, РФ Тырааныспарын министиэристибэтигэр сурук бэлэмнээн ыыттыбыт. Дьокуускай аэропуордун реконструкциятын кэмигэр авиаперевозчиктары эбии сүүмэрдииргэ «Якутия» авиахампаанньа ааллара Москваҕа диэри көтөллөрүгэр субсидия харчытын көрөллөрүгэр көрдөстүбүт.

Салгын тырааныспарын хампаанньаларыгар федеральнай бүддьүөттэн 2023 с. субсидия көрөргө Росавиация муус устар 25 күнүгэр эбии сүүмэрдээһин биллэрбитэ. Ол түмүгэ бэс ыйыгар биллиэхтээх.

Ыам ыйыгар уонна бэс ыйыгар «Аэрофлот» авиахампаанньа Дьокуускай — Москва икки ардыгар рейсэ оҥорботунан сибээстээн, чэпчэтиллибит билиэт атыыламмат.

«Якутия» авиахампаанньа Дьокуускай — Москва, Дьокуускай — Минеральные Воды хайысхатынан «Нэдиэлэ рейсэтэ» диэн хас нэдиэлэ аайы аахсыйа оҥорор. Билиэт сыанатын олохтоох авиахампаанньа, ГАВС саайтыгар киирэн көрүөххэ сөп», — диэн СӨ Тырааныспарга, суол хаһаайыстыбатыгар миниистир солбуйааччыта Ольга Рафаилова эттэ.

Владивосток — Москва билиэтэ 25 823 солк.

Үгүс айанньыттар туттар «Aviasales» саайтарыгар киирэн көрдөххө, Владивосток — Москва хайысхатынан бара-кэлэ бэс ыйын 12-26 күннэригэр биир киһиэхэ билиэт сыаната 25 823 солк. Сөмөлүөт 8ч. 50 мүн. көтөр.

Оттон Дьокуускайтан ити күннэргэ Москваҕа диэри бара-кэлэ билиэт сыаната 88 400 солк. Владивосток биһигиттэн быдан ыраах сытар, Москваҕа диэри айан икки чаастан ордук уһун эрээри, билиэт сыаната хас да төгүл чэпчэки.

Владивостокка 2022 с. орто хамнас 87 827 солк., Москваҕа диэри билиэт сыаната хамнас чиэппэрин ылар. Дьокуускайга 2022 с. орто  хамнас 95 315 солк. тэҥнэспитэ, дойду киин куоратыгар билиэт сыаната  88 400 солк.

Биллэн турар, тутуу, бырамыысыланнас, доруобуйа харыстабылын хамнастаах үлэһиттэрэ итиччэ сыаналаах билиэти уйунуохтарын, дьиэ кэргэннэрин муораҕа сынньата илдьиэхтэрин сөп. «Ыам ыйынааҕы ыйаахха» киирбэтэх «атыттар» диэн ааттанар бүддьүөт үлэһиттэрэ Дьокуускайга 45 000-50 000 солк. хамнастаахтар, кинилэр икки хамнас саҕа билиэти атыылаһаллара күчүмэҕэй.

Онон дьиҥ олоххо ким төһө хамнастааҕыттан көрөн, салгын тырааныспарын тарыыбын олохтуур оруннаах буолуо этэ.  Биир Уһук Илин эрэгийиэҥҥэ олоробут эрээри, Владивостоктан Москваҕа диэри билиэт сыаната быдан чэпчэки, оттон Дьокуускайтан хас да төгүл ыарахана өйдөммөт. Уһук Илин куораттарыгар биир тэҥ соҕус тарыып олохтоноро тоҕоостоох. Дьокуускайга халыҥ харчы туһугар харбыалаһыы, туохха да топпот иҥсэ-обот улахана киһини сөхтөрөр. 

Хаартыска: «Якутия» авиахампаанньа саайтыттан