“Кыайыы 70 сыла-2” СОНТ чилиэннэрэ учаастактарын ылан баран, уот, гаас ситимэ кыайан тардыллыбакка, баччааҥҥа диэри дьиэлэригэр киирэ иликтэр. Сирдэрин ылаары уонунан сыл уочараттарын күүппүт аарыма кырдьаҕас бэтэрээннэр сыл ахсын аҕыйаан иһэллэр.
Дьокуускай куорат тутууга уонна транспортнай инфраструктураҕа департаменын салайааччыта Северина Архипова учаастактары инженернэй ситиминэн, суолунан хааччыйыы туһунан маннык быһаарар.
«Аҕа дойдуну көмүскүүр сэрии бэтэрээннэригэр, кинилэр огдооболоругар уонна элбэх оҕолоох ыалларга бэриллибит сир учаастагын икки ардыгар түҥэтиллэ илик сир баар. Дьокуускай куорат уокуругун генеральнай былааныгар уларытыы киллэрэн, бу сири элбэх оҕолоохторго биэрэр туһунан боппуруоһу хамыыһыйаҕа көрүөхтээхтэр. Өскөтүн ити этиини өйөөтөхтөрүнэ, СОНТ кыраныыссатыгар диэри инженернэй ситими тардыы уонна суолу тутуу боппуруоһун көрүөххэ сөп.
СОНТ кыраныыссатын туһунан 2017 с. от ыйын 29 күнүгэр тахсыбыт 217 №-дээх Федеральнай сокуон 7 ыстатыйатыгар олоҕуран, оҕуруот аһын олордор учаастакка табаарыстыба чилиэннэрэ бэйэлэрин күүстэринэн инженернэй ситими киллэриэхтээхтэр уонна суолларын оҥостуохтаахтар», — диэн этэр.
Куорат дьаһалтата ИЖС-ка киирбит эрэ учаастактары инженернэй ситиминэн хааччыйар, киирэр суолу оҥорор. Оттон СОНТ учаастактарыгар табаарыстыба чилиэннэрэ бэйэлэрин үптэригэр уоту, гааһы киллэрэллэр, суолларын оҥоттороллор. Куораттан тэйиччи сытар учаастактарга ити боппуруоһу быһаарарга, биллэн турар, сүүһүнэн мөлүйүөн үп-харчы ирдэнэр, ону биэнсийэлээх сэрии бэтэрээннэрэ хайдах уйунуохтарай?
-
1
-
0
-
0
-
0
-
0
-
2
