Урут биһиги өбүгэлэрбит суол-иис, сырыы мөлтөҕүттэн, үлэҕэ-хамнаска ыктаран даҕаны, үксүгэр суорумньунан холбоһоллоро. Онон, суорумньу саха омук биир төрүт үгэһэ буолар, ону билиҥҥи олоххо сөп түбэһиннэрэн сөргүттэххэ, аҥаардас сылдьар дьон аналларын булуо, олохторун оҥостуо, ыал ийэтэ-аҕата буолар дьолу билиэ, саха ахсаанын элбэтиэ этилэр. Дьэ, итинник санаанан салайтаран, Алексей Михайлович «Кыталык» суорумньу кулуубун тэрийэн үлэлии-хамсыы сылдьар. Быйылгы сааскы тэрээһин туһунан маннык кэпсиир:
– Кистэл буолбатах, ханна да тиий, улуустар да кииннэригэр, нэһилиэктэргэ даҕаны, аҥаардас сылдьааччы олус элбэх: огдообо хаалбыттар, арахсыбыттар, эргэ тахсыбатах кыргыттар, ойох ылбатах уоланнар... Дьэ итинник дьон аналларын булан, олохторун оҥостоллоругар көмөлөһөр сыалтан улуустарга баар билсиһии кулууптарын кытары сүбэлэһэн, сыллата хас да көрсүһүүнү тэрийэбит. Онно элбэх киһи кэлэн, астынан, махтанан тарҕаһаллар, пааралар үөскээн, салгыы билсэн, бодоруһан, бэйэ-бэйэлэрин үөрэтиһэн баран, ыал буолаллар. Маннык киэһэлэргэ хайаан да чөл олоҕу тутуһуннарабыт, дьоммутун арыылаах алаадьынан, кымыһынан айах тутан көрсөбүт, быһата, истиҥ-иһирэх, киэҥ-холку сахалыы эйгэни тэрийэбит.
Быйылгы сааскы биир тэрээһин муус устар 8️ күнүгэр буолуоҕа. Онно сулумах сылдьар, чөл олоҕу тутуһар 40-тан аҕа саастаах эр бэртэрин уонна кэрэ аҥаардары «Сүрэххитинэн сөбүлэһэн, хараххытынан хайҕаһан» диэн билсиһии дьоро киэһэтигэр ыҥырбыт.
Эһигини күүтэр: минньигэс астаах буфет көрдөөх, бириистээх оонньуулар, сахалыы ырыанан бытаан үҥкүүлэр, 1980-с – 1990-с сыллардаах муусуканан ностальжи-дискэтиэкэ.
Кыттыыны ылаллар: Дьокуускайтан өрөспүүбүлүкэ таһымнаах «Кыталык, Чурапчыттан «Аартык», Тааттаттан «Эрэл» билсиһии кулууптара.
Буолар сирэ: Мэҥэ Хаҥалас улууһун Чүүйэ сэлиэнньэтэ, «Хатыҥ Ай» култуура киинэ, Скрябин аатынан уулусса 22 №-рэ.
Саҕаланар: киэһэ 6 чаастан. Киирии билиэт: 500 солкуобай. Арыгы бобуулаах. Ким интэриэһиргээбит маннык төлөпүөннэринэн билсиҥ: 89141000973, 89141057428 (Дьокуускай), 89142814737 (Чурапчы), 89248998527 (Таатта).
-
4
-
0
-
0
-
0
-
0
-
0
