Уопсастыба

Бу күн Саха сирин үрдүнэн, хас куорат, бөһүөлэк уонна нэһилиэк ахсын бырааһынньыктааҕы дьаһаллар тэриллэллэр. Өрөспүүбүлүкэ киин куоратыгар бүгүҥҥү тэрээһин Орджоникидзе аатынан болуоссакка, саха судаарыстыбаннаһын төрүттэспит Платон Алексеевич Ойуунускай пааматынньыгар үөрүүлээх миитинтэн итиэннэ тыыннаах сибэкки дьөрбөтүн уурууттан саҕаланна.

— Былатыан Ойуунускай пааматынньыгар сибэкки дьөрбөтүн уураары тураммыт, биһиги өрөспүүбүлүкэни олохтообут дьоммутун Максим Аммосовы, Исидор Бараховы уонна да атыттары дириҥ махталынан ахтабыт. Билигин, балаһыанньа төһө даҕаны уустугун, арҕааҥҥылар араас сааҥсыйанан тууйа сатаабыттарын үрдүнэн, дойдубут иннин диэки эрэллээхтик хардыылыыр. Саха Өрөспүүбүлүкэтэ социальнай-экэнэмиичэскэй сайдыытынан Уһук Илиҥҥи федеральнай уокурука инники күөҥҥэ сылдьар, бырамыысаланнаска лидер буолар, итиэннэ ол барыта күннээҕи олоххо сабыдыаллыыр. Сылтан сыл ахсын Сахабыт Сиригэр олох-дьаһах туруга өссө тупсан, нэһилиэнньэ ахсаана элбээн иһэригэр эрэнэбин. Ол биһиги өрөспүүбүлүкэбитин төрүттээбит чулуу дьоммут үтүө ааттарын үйэтитии биир көрүҥэ буолуоҕа. Бука барыгытыгар ситиһиилэри, чэгиэн доруобуйаны баҕарабын. Өрөспүүбүлүкэ күнүнэн Уруй-Айхал! – диэтэ Ил Дархан Айсен Николаев.

– Судаарыстыбаннаһы ылыы – биһиги тыйыс айылҕалаах хотугу дойдубутугар олорор норуоттар устуоруйаларыгар сүрүн быһаарар суолталаах уонна инники сайдыы акылаатын уурбут түһүмэх буолар. Өрөспүүбүлүкэ 100 сылын былырыын бэлиэтээбиппит, сүүс сыл диэн киһи олоҕор уһун, оттон судаарыстыба устуоруйатыгар кылгас, биир түһүмэх кэм. Өссө 1917 сыл инниттэн саха судаарыстыбаннаһын туһугар турууласпыт улуу дьоммут ытык ааттарын биһиги умнубаппыт, кинилэри Максим Аммосовы Исидор Бараховы, Степан Аржакову, Степан Васильевы уонна бу бүгүн пааматынньыгар мустан турар Былатыан Ойуунускайы кытары сэргэ тутабыт, – диэтэ Ил Түмэн Бэрэссэдээтэлин бастакы солбуйааччы Александр Жирков.

Салгыы бэйэтин эҕэрдэтин куорат дьаһалтатын баһылыга Евгений Григорьев эттэ. Үөрүүлээх тэрээһиҥҥэ бырабыыталыстыба чилиэннэрэ, норуот дьокутааттара Павел Пинигин, Яков Ефимов, Михиал Гуляев, Николай Кульбертинов, Матвей Евсеев, Валерий Лютый, Михаил Эверстов, судаарыстыбаннай былаас уорганнарын бэрэстэбиитэллэрэ уонна салайааччылара, уопсастыбаннас, ыччат кыттыыны ыллылар.