Уопсастыба

Ити сыл бэс ыйыгар Былатыан Ойуунускай салайааччылаах бастакы Бырабыыталыстыба тэриллибитэ. Саха Сирин социальнай-экэнэмиичэскэй сайдыытын саҥа түһүмэх кэмэ саҕаламмыта. Дойду сайдыытын саҥа түһүмэҕэ саҕаламмыт кэмигэр, 1992 с. муус устар 27 күнүгэр Саха Өрөспүүбүлүкэтин Төрүт Сокуона бигэргэммитэ. Онон муус устар 27 күнэ Саха Өрөспүүбүлүкэтин төрөөбүт күнэ буолар.

Саха Өрөспүүбүлүкэтин күнэ национальнай бырааһынньык быһыытынан далааһыннаахтык бэлиэтэнэр норуот бырааһынньыгар кубулуйда. Бу күнү көрсө өрөспүүбүлүкэ үрдүнэн, хас куорат, бөһүөлэк уонна нэһилиэк ахсын бырааһынньыктааҕы дьаһаллар тэриллэллэр, болуоссаттарга кэнсиэрдэр, норуот күүлэйэ, араас көрүҥнэригэр күрэхтэһиилэр, быыстапкалар, дьаарбаҥкалар ыытыллаллар.

Саха судаарыстыбаннаһын олохтообут чулуу дьоммутун ахтан-санаан ааһабыт, кинилэргэ анаммыт өйдөбүнньүктэргэ сүгүрүйэн, тыыннаах сибэкки дьөрбөтүн уурабыт. Кинилэр кытаанах дьулуурдарынан, норуоттарын барҕара сайыннарар барҕа баҕаларынан, Саха Сирэ аптаныамыйалаах өрөспүүбүлүкэ буолара ситиһиллибитэ, сайдыы аартыгар үктэммитэ.

Киин куорат Орджоникидзе аатынан болуоссатыгар биллиилээх судаарыстыбаннай диэйэтэл, саха суругунан уус-уран литературатын олохтоспут, суруйааччы, бэйиэт, саха аптаныамынай өрөспүүбүлүкэтин олохтуур туһунан санааны бастакынан көтөхпүт Былатыан Ойуунускай пааматынньыгар тыыннаах сибэкки дьөрбөтүн ууруу сиэрэ-туома ыытылынна.

Ил Дархан Айсен Николаев, Ил Түмэн Бэрэссэдээтэлин бастакы солбуйааччы Александр Жирков, киин куорат баһылыга Евгений Григорьев, куорат Дууматын бэрэссэдээтэлэ Альберт Семенов, Бырабыыталыстыба чилиэннэрэ, норуот дьокутаатара, АБДь кыттыылаахтара, Уопсастыбаннай Балаата чилиэннэрэ, уопсастыбаннай түмсүүлэр бэрэстэбиитэллэрэ, ыччаттар, куорат олохтоохторо кыттыыны ыллылар.

– Бүгүн биһиги өрөспүүбүлүкэбит дьылҕатын быһаарбыт икки дьоһуннаахай даатаны бэлиэтиибит. 1922 сыллаахха бу күн Саха аптаныамыйата олохтоммута, ону олохтообут чулуу дьоммутун кэриэстиибит. Ол кэнниттэн 70 сыл буолан баран, 1992 сыллаахха, саҥа Арассыыйаҕа эмиэ бу күн Төрүт сокуоммут ылыллыбыта, өрөспүүбүлүкэбит саҥа кэмҥэ сайдар тосхоло ылыллыбыта. Ити иһин биһиги махтанабыт, сүгүрүйэбит Бастакы Бэрэсидьиэммит Михаил Николаевка. Кини уустук 1990-с сылларга судаарыстыба бэлиитикэтигэр, федеральнай сыһыаҥҥа саҥа көрүүлэри олохтообутун түмүгэр Сахабыт Сирэ үүнэ-сайда турар. Өссө төгүл бырааһынньыгынан, туохтан да толлубакка иннибит диэки баран иһиэҕиҥ, кыайыылаах-хотуулаах буолуоҕуҥ! – диэтэ Айсен Николаев.

– Ытыктабыллаах куорат олохтоохторо, Сахам Сирин дьоно, барыгытын Өрөспүүбүлүкэбит күнүнэн куорат дьаһалтатын уонна тус бэйэм ааппыттан итиитик-истиҥник эҕэрдэлиибин. Улуу убайдарбыт Былатыан Ойуунускай, Максим Аммосов, Исидор Барахов, Степан Васильев, Степан Аржаков көҕүлээһиннэринэн уонна кинилэр доҕотторун, биир санаалаахтарын саҕалааһыннарынан Саха Өрөспүүбүлүкэтэ олохтонон, күн бүгүн чэчирии сайда-үүнэ турар. Кинилэргэ махталбыт бэлиэтигэр бүгүн бу болуоссакка мустан турабыт. Өрүү баар буоллун сахабыт норуота, өрүү баар буоллун уонна чэчирии сайда туруохтун Сахабыт Өрөспүүбүлүкэтэ! – диэтэ киин куорат баһылыга Евгений Григорьев.

Болуоссат киинигэр үрдүк суорба тааска сото кэбиһэн турар Былатыан убайбыт барахсан бырааһынньыктыы таҥнан-саптан кэлбит дьону, сааскы чаҕылхай күн уотугар сыламныыр тыыннаах сибэккилэри болҕомтолоохтук көрөргө-истэргэ, сэҥээрэргэ дылы гынар.

Хаартыскаҕа Андрей Сорокин (ЯСИА) уонна ааптар түһэриилэрэ