Иван Васильевич РФ үлэтин бэтэрээнэ, Саха Республикатын Профессиональнай үөрэхтээһин туйгуна, Хаҥалас, Үөдэй нэһилиэктэрин Бочуоттаах олохтооҕо. Кини өссө оскуолаҕа үөрэнэ сылдьан ийэтинээн Марфа Ивановналыын талкыга үчүгэйдик субаламмыт ынах тириитин имиппиттэр.
Сүөһү тириитин биир да сиринэн быһаҕынан хайа быспакка сүлэллэрэ. Онтон тэниччи тиирэн куурдаллар, аһара хата илигинэ ылан сыатын, субатын үрүөҕүнэн ыраастыыллар, оччоҕо тирии биллэ чарааһыыр. Үрүөх тиистэрдээх, ортотунан тиэрбэстээх, тимиртэн оҥоһуллар. Тимир уустара таптайан баран икки төбөтүн холбуу туталлар-төбөтө синньигэс буолар. Ону тиит маһынан оҥоһуллубут укка кэтэрдэллэр.
Кыһыах эмиэ итинник оҥоһуллар. Уратыта диэн төгүрүк гына тапталлыбыт тимир тииһэ суох сытыыланар.
Үчүгэйдик ыраастаммыт тирии дөбөҥнүк имитиллэр. Имитиэх иннинэ бөлөнөҕүнэн сотон сымнатыллар. Талкыга икки киһи үлэлиир-биирэ тириини баайан баран улахан дүлүҥ талкыга баттыалыыр, иккис киһи (үксүгэр улаатан эрэр уол оҕо) эриллэ сылдьар тириини эргитэн биэрэр.
Имитиллибит ынах тириитин ороҥҥо тэллэх оҥостоллор, кыһын бултка кэтиллэр куруму тигэллэр.
-
0
-
0
-
0
-
0
-
0
-
0
