Уопсастыба

Дьөккөн нэһилиэгин олохтооҕо Исидор Ионов баһылыктаах бааһынай хаһаайыстыба Лүксүгүн учаастагар олохсуйан үлэлиир. 2015 с. «Үлэтин саҥа саҕалыыр бааһынай хаһаайыстыба», 2019 с. «Дьиэ кэргэн пиэрмэтин сайыннарыы» федеральнай бырагыраамаларга тирэҕирэн, базатын оҥостон-тэринэн, үлэ-хамнас хас да көрүҥүн тэрийэн олорор. Барыта 160 ынах сүөһүлээх, ол иһигэр 102 ыанар ынахтаах итиэннэ 40 биэлээх. Былырыын астыыр сыаҕы арыйбыта, онон үүтүн-этин бэйэтэ астаан батарар. Быйыл 205 туонна үүтү соҕотуопкалыыр сорудахтаах, ону толорорго эрэллээх. Сүөһүнү-сылгыны таһынан хаһаайыстыба 50 ийэ сибиинньэлээх. Сыл саҕаланыаҕыттан, нэһилиэнньэҕэ 150 сибиинньэ оҕотун атыылаабыт.

Саха сиригэр саҥа салаа быһыытынан биллэр мүөттээх ыҥырыаны иитиигэ Ионовтар ылсыбыттара тоҕус сыл буолла. Бу көрүҥү балачча баһылаатылар, былырыын 500 киилэ мүөтү ылбыттара. Быйыл Тыа хаһаайыстыбатын министиэристибэтин уонна Бүлүү улууһун дьаһалтатын өйөбүллэринэн, Татарстантан татаар тииптээх нуучча боруода ыҥырыа 100 дьиэ кэргэнин атыылаһан аҕаллылар. Онон Өрөспүүбүлүкэҕэ мүөттээх ыҥырыаны ууһатан тарҕатыыга племенной репродуктор буолар былааннаахтар. Саҥа ыҥырыаларыгар анаан кыстык дьиэни, омшанигы, оҥорон бэлэмнээбиттэр.

Агротуризмынан былырыыҥҥыттан дьарыктаналлар. Кинилэр көрдөрөллөрө үгүс: сүөһү иитэр комплексы, сылгы көньүүһүнэтин, ньирэйдэри, боросуонактары, кулунчуктары, ыҥырыалары уонна астыыр сыаҕы ким барыта кэрэхсиир. Онон сөптөөх дьиэни-уоту тутан, туристарга тыа сирин үлэтин-хамнаһын сырдатар, кинилэри сахалыы сибиэһэй аһынан күндүлүүр, өссө доруобуйаларын чэбдигирдиэхтэрин баҕарар дьоҥҥо апитерапия (ыҥырыа көмөтүнэн эмтэнии), иппотерапия (ат көмөтүнэн эмтэнии) өҥөлөрүн тэрийэр бырайыагы оҥороннор, «Агротуризм» гранын куонкуруһугар быйыл сайын киирсибиттэрэ. Ол бырайыактара биһирэнэн, 7,5 мөл солк суумалаах грант хаһаайына буолла.  Санатан эттэххэ, «Агротуризм» бырагыраамата олоххо киллэрилибитэ төрдүс сыла буолла. Былырыын Сунтаар улууһугар олорор Яковлевтар дьиэ кэргэннэрэ 10 мөл солк граны ылбыта.