«Тымныы полюһа» кэпэрэтиип былырыын Тыа хаһаайыстыбатын министиэристибэтин чэрчитинэн потребительскэй кэпэрэтииптэр икки ардыларыгар ыытыллыбыт куонкурус гранын ылан, бу саҥа титииги тутары ситистэ. Саҥа маһынан сандаарбыт титииги Остуолба олохтоохторо биригэдьиир Иннокентий Горохов салалтатынан, олус кыһаллан-мүһэллэн туттулар. Онон, аны сайын «Алгыс» ынахтара уонна ньирэйдэрэ кыстыктан манна тахсан, сайылыахтара.
Өр сылларга, сопхуос саҕаттан бу сайылыкка ыанньыксыттаабыт тэрилтэ бэтэрээнэ Любовь Гуляева саҥа хотону алҕаата, алаадьылаах, саламааттаах быырпаҕынан аал уоту, сири аһатта, хороҕор муостаах аны да эбиллэ турарыгар баҕатын эттэ, ырыа ыллаата.
Титииккэ киирэр аалай кыһыл лиэнтэни улуус баһылыга Владислав Иванов, «Тымныы полюһа» кэпэрэтиип салайааччыта Екатерина Портнягина уонна тутуу биригэдьиирэ Иннокентий Горохов быһа кырыйдылар.
Улуус баһылыга Владислав Иванов саҥа титиик тутуллубутунан эҕэрдэлээн туран, иникитин улууска сайылык тутуутун бырагырааматын оҥорорго сорудахтаата, дизельнай электростанция сэртипикээтин туттарда, тыа хаһаайыстыбатын улуустааҕы управлениетын исписэлииһэ Евгения Гатилова ынаҕы ыыр икки аппараат сэртипикээтин туттарда.
Саҥа титиик тутууга түмүктэммитинэн кэпэрэтиип кэлэктиибиин уонна ыалдьыттарын Дьааҥы куорат Култууратын дьиэтин үлэһиттэрэ ырыанан эҕэрдэлээтилэр.
-
3
-
0
-
0
-
0
-
0
-
0
