Владимир Прокопьев, Ил Түмэн Олохтоох салайыныыга сис кэмитиэтин бэрэссэдээтэлэ:
— 2023 сыл этэҥҥэ ааһан эрэр, күһүҥҥү быыбардар көхтөөхтүк аастылар, Ил Дархаҥҥа элбэх куолаһы биэрбиппит. Айсен Николаев көҕүлээһининэн өрөспүүбүлүкэҕэ сир баайын хостооһун, бырамыысыланнас эрэ буолбакка, креативнай экэниэмикэ эмиэ күүскэ сайдар. 2027 сылга диэри киинэ устар павильон тутуохтара, манна тыаһы-ууһу устар, дьону саҥардар, монтажтыыр устуудьуйа баар буолуоҕа, өҥү-дьүһүнү тупсарар кыахтаныахтара, виртуальнай устуу ыытыахтара. Тохсунньу тоһуттар тымныытыттан тохтообокко айар бөлөх киинэни төгүрүк сыл устан, саха киинэтин сайдыыта саҥа үрдэллэри дабайыа. Маннык улахан киинэ устар павильон Уһук Илин эрэгийиэҥҥэ соҕотох буолуо.
Ону таһынан, норуот дьокутааттара туруорсууларынан уһуйаан, оскуола остолобуойдарыгар олохтоох аһы-үөлү, үрүҥ илгэни, эт аһы киллэриэхтэрэ. Балыыһалар, социальнай тэрилтэлэр астарын хаачыстыбатын эмиэ тупсарыахтара. Төгүрүк сыл үлэлиир «Саюри» тэпилииссэҕэ оҕурсуттан саҕалаан, билигин кыһыннары клубника, тропическай фрукта кытта үүннэрэн эрэллэр. Онон Сахабыт Сирин сайдар саҕахтара сыл ахсын кэҥээн иһэллэр.
«Ил Түмэн» хаһыат ааҕааччыларыгар саха алмааһын курдук кытаанах доруобуйаны, эйэлээх халлааны, анал байыаннай дьайыы түргэнник түмүктэнэн, эдэр ыччаттарбыт дойдуларыгар этэҥҥэ эргиллэн кэлэллэрин баҕарабын!
-
0
-
0
-
0
-
0
-
0
-
0
