Антонина Григорьева, Ил Түмэн Наукаҕа уонна үөрэххэ сис кэмитиэтин бэрэссэдээтэлэ:
- Убаастабыллаах Сахабыт Сирин олохтоохторо! Кэлэн иһэр саргылаах саҥа дьылынан, соргулаах саҥа дьолунан! Ааһан эрэр 2023 сылбыт хас биирдиибитгэр умнуллубат үтүө күннэри, долгутуулаах түгэннэри бэлэхтээтэ. Элбэх сыал-сорук туруоруллан олоххо киирдэ диэн киэн тутта этэбит. Ол курдук, Педагог уонна уһуйааччы сылыгар бэрт элбэх тэрээһиннэр, учууталлары өйүүр дьаһаллар ылылыннылар. Үөрэнээччилэрбит, устудьуоннарбыт Сахабыт Сирин бүтүн Арассыыйаҕа киэн туттардыы иһитиннэрдилэр.
Дойдубутугар буола турар балаһыанньа тургутууну тутуорда, ол эрээри сомоҕолоох, түмсүүлээх, күүстээх норуот буоларбытын өссө биирдэ дакаастаата.
Күндү доҕоттор! Ил Дархан Айсен Николаев кэлэн иһэр сылы Оҕо саас сылынан биллэрбитэ олус улахан суолталаах. Кэнчээри ыччаппыт, оҕолорбут билиилэрэ-көрүүлэрэ, олоххо тардыһыылара күүһүрэ турдун, хас биирдиибитин билиилэринэн, кыайыыларынан үөрдэ, киэн тутуннара сырыттыннар. Кэлэр сылга оҕолорбут, сиэннэрбит ситиһии сиэттиһилээх сырыттыннар, ыччаппыт баҕарар үөрэхтэригэр киирдиннэр.
Кэлэн иһэр 2024 сылга санаабыккыт сатаннын, ылсыбыккыт ылыннарыылаах, баҕарбыккыт баһыылаах, үлэҕит үөрүүлээх, дьоҥҥут дьоллоох, доруобуйаҕыт чэгиэн, сырыыгыт кэскиллээх буола турдун!
-
1
-
0
-
0
-
0
-
0
-
0
