Уопсастыба

Биһирэмҥэ библиограф Мария Иванова саҥа кинигэни аахпатах да киһи өйүгэр түһэр курдук ырытта. Мантан биһиги бу Октябрина Прокопьевна 25-с кинигэтэ буоларын, 7 түһүмэхтэн турарын, араас сылларга Сиэйэ оскуолатыгар үөрэммит оҕолортон Ийэ дойду уонна сокуон көмүскэлигэр үлэлээбит-хамсаабыт 31 (!) аппыһыар иитиллэн тахсыбыт.

Үөрэҕирии түмэлин тэрийбит Альбина Григорьевна уонна кини биир идэлээхтэрэ ааптар ураты үлэһитин бэлиэтээтилэр, Сиэйэ диэн ааты кытта Октябрина аата арахсыспатын ыйдылар. Улуус култууратын салайааччы Саргылаана Омукова истиҥ эҕэрдэтин кытары аны ускуустуба дьонун үйэтитэргэ сакаас биэрдэ. Сиэйэ нэһилиэгин баһылыгын солбуйааччы Арсен Семенов көҥүл тустуу маастара, уһулуччулаах тириэньэр Николай Михайлов иитиллээччитэ, Сиэйэ спортсменнарын туһунан кинигэ уочаракка ылыллара буоллар диэн ыра санаалааҕын биллибит. Сиэйэ орто оскуолатын саабыһа Лариса Афанасьевна бу кинигэ оҕону үөрэтиигэ бэлэм методическай матырыйаал диэн учуутал киһи хараҕынан сыаналаата. СТК үлэһиттэрэ -- дириэктэр Гаврил Михайлов, аҕа түмсүүтүн чилиэнэ Константин Тойбохоевич маннык үтүө дьыаланы атын нэһилиэктэр эмиэ батыһаллара, дьоннорун үйэтитэллэрэ буоллар диэн баҕа санааларын эттилэр.

Сиэйэ кулуубун дириэктэрэ, Мария Ефимова бу Максимовтара суох нэһилиэк уопсастыбаннай олоҕо барбатын бэлиэтээн туран, Алексей Михайлович кэргэнигэр Октябрина Прокопьевнаҕа айымньылаахтык үлэлиир усулуобуйаны тэрийэригэр махталын эттэ. Инбэлииттэри кытары үлэни сүрүннүүр Наталья Максимова кинигэни суруйуу улахан дьаныартан, билииттэн тахсарын бэлиэтээтэ.
Биир долгутуулаах түгэнинэн Августина Саввинова этиитэ буолла. Милииссийэ 100 сыллаах үбүлүөйдээх кинигэтигэр кини аҕата Саввинов Сергей Васильевич киллэриллибэтэҕин санатан туран, бу кинигэҕэ киирэн үйэтитирбитигэр уолунаан кэлэн улахан махталларын биллэрдилэр.
Октябрина бииргэ үөрэммит дьүөгэтэ, кинигэ кыһатыгар үлэлээбит Римма Николаевна 48 сыл анараа өттүгэр дьүөгэтэ эйигинэ суох эргэ барбаппын диэбитигэр кэлэн шафердаабытын, төннөөрү хаайтаран хаалан үөрэҕиттэн үүрүллэ сыспыт ыксаллаах түгэнин ахтан күллэрдэ.
Улахан оҕолоро, Бордоҥ оскуолатын дириэктэрэ Михаил Максимов олунньу 14 күнүгэр ийэлээх аҕата ыал буолан олорбуттара 48 сыла туолбутун иһитиннэрэн саала ытыс тыаһынан ньиргийэ түстэ.

Ити курдук Зинаида, Николай Гороховтар, Уус Алдантан сыбааттара Анна  Троева кэлэн эҕэрдэлэрин тиэртилэр. Куораттан, араас сирдэртэн аппыһыардар видеонан ахтыыларын, эҕэрдэлэрин ыыпытыра көрдөрүлүннэ. Урут эдэр эрдэҕинээҕилэрин эрэ билэр дьоммут баараҕадыйбыттарын көрөммүт олус үөрдүбүт. Оҕо эрдэхпинэ Халбаакка ыаллыы олорбут, убайым тэҥэ Револий Дмитриев муоранан устар суудуна хаппытаана буолан араас сирдэринэн устубутун, оччолорго олус күндү ыстыыр ыаһы (жевачканы), фломастеры кэһии аҕалбытын санаатым. Сиэйэ ырыаһыт кыргыттара кэрэ көстүүлэринэн, ылбаҕай ырыаларынан киэргэттилэр. Изаккам, Дууккам, Оруоһуккам ыллыы-туойа сылдьалларын көрөн манньыйдым. Музыкальнай оскуола учуутала Анатолий Пахомов Шаман репертуарыттан ырыатын саала барыта атаҕар туран көрүстэ.

Дьэ, бу курдук Сиэйэ патриота Октябрина Булатова-Максимова билиҥҥи кэмҥэ бэрт тоҕоостоох, иитэр-үөрэтэр суолталаах кинигэтэ күн сирин көрдө! Кинигэни Сиэйэ дьаһалтата (баһылык, астаапкаҕа тахсыбыт майор Александр Романов) үбүлээбит. Тэрээһини Мария Алексеева, Саргылаана Генерова кыайа-хото тутан ыыттылар.