Үөрүүлээх тэрээһини Олоҥхо тыйаатырын артыыстара арыйдылар. Быыстапканы искусствовед, куратор Галина Сафронова сырдатта, салгыы култуура миниистирин солбуйааччы Мария Турантаева, түмэл салайааччыта Влада Тимофеева, епархияттан Владыка Роман, худуоһунньуктар Сойуустарыттан Наталья Николаева, төрөөбүт Тааттатыттан улуустааҕы норуот айымньытын дьиэтин дириэктэри солбуйааччы Марианна Степанова, искусствовед Ася Габышева уонна худуоһунньук сиэнэ Иван Попов- II эҕэрдэ тылы эттилэр.
Быыстапка туһунан Таатта улууһун баһылыга Айаал Бурцев "Иван Васильевич Попов – талыы-талба Таатта сириттэн силигилээн үүнэн тахсыбыт ХХ үйэ интелегенциятын биир чаҕылхай представителэ буолар.
Айылҕаттан уруһуйдуур дьоҕурун норуотугар анаан, саха ойуулуур-дьүһүннүүр искусствотын сайдыытыгар, атаҕын туруутугар сүдү кылааты киллэрбитэ. Норуот материальнай культуратын, саха барахсан мындыр толкуйунан, көмүс тарбахтарынан чочуйан оҥорбут, иистэммит үлэлэрин аан дойду таһымыгар таһааран, Таатта уустарын үлэлэрин Германия, Англия дойдуларын аатырбыт музейдарыгар күн бүгүн көрүөххэ сөп. Худуоһунньук төрөөбүт балаҕаныттан ыллык суолтан киэҥ, баай историялаах олоҕу олорбута, кини этнограф, фотограф, норуот эмчитин быһыытынан эмиэ киэҥник биллибитэ.
Көмүс буукубаларынан суруллар Иван Васильевич аата төрөөбүтэ 150 сылыгар анаммыт, кини талааннаах тарбахтарынан уруһуйдаан, хаартыскаҕа түһэрэн хаалларбыт “Талыллыбыт айымньылара” таптыыр, сүгүрүйэр норуотун иннигэр тахсыбыта, бэйэтэ бэлэх буолар. Кини аатын төрөөбүт Тааттын дьоно-сэргэтэ умнубат, аатын ааттыыр, сүгүрүйэр.
Саха Өрөспүүбүлүкэтин ойууга-дьүһүҥҥэ бас түмэлигэр бу улахан быыстапканы тэрийбиттэригэр таатталар ааттарыттан махтанабыт, үлэҕитигэр ситиһиилэри баҕарабыт”, - диэн санаатын эттэ.
Быыстапкаҕа хаама сылдьан оҕо эрдэхтэн билэр “Ойуун”, “Торбос”, үйэлээх, суолталаах тутуулары кэрэһэлиир үлэлэрин атын хараххынан, бэйэҥ олорор үйэҕинэн ылынаҕын. Манна даҕатан суруйдахха, Иван Васильевич өлүөн эрэ иннинэ Суорун Омоллооҥҥо “Ойуун” бастакы варианын Петербурга үөрэнэ сылдьан немец коллекционерыгар атыылаабытын этэн турар.
Иван Васильевич айылҕаттан дьоҕурдаах айыллан, үөскээн- төрөөр ааспыт буолан, Тааттатын үрэҕэ таһымныырын, наҕыллык устарын курдук, кини сыдьааннара удьуор харалы уруһуйдьут буола тэнийэн, саҥаттан саҥа ааттара ааттана турар. Ол туоһутунан аҕаларын, эһэлэрин айымньытын сэргэ Иван Попов-I, Гавриил Петров, Иван Попов-II, Гаврил Попов үлэлэрэ көрдөрүүгэ турдулар.
Ускуусубаны сэҥээрээччлэри түмэл үлэһиттэрэ ыам ыйын 5 күнүгэр диэри күүтэллэр. Кэрэ кэрэни үөскэтэр.
Вера КАНАЕВА
-
6
-
1
-
0
-
0
-
0
-
0
