Бэҕэһээ икки киһи сүлүһүннээх ыарыыттан сырдык тыына быстыбыт. Быраастар хроническай ыарыылаах дьон дьаҥ суодулун кыайан тулуйбатылар диэн этэллэр.
Өрөбүл күннэр устата 2 тыһыынча кэриҥэ анаалыс оҥоһуллубут. Уопсайа дьаҥ саҕаланыаҕыттан өрөспүүбүлүкэ 13 лабаратыарыйатыгар барыта 328 тыһыынча анаалыһы оҥорбуттар.
Күн бүгүн коронавирус дьаҥа ыраах сытар бөһүөлэктэргэ тиийдэ. Онон нэһилиэктэр баһылыктара кытаанах миэрэлэри ылаллара уолдьаста. Хас биирдии киһи ыарыыны тарҕатааччы буоларын өйдүөхтээх, мээнэ солуута суох кэлиини-барыыны, сынньалаҥы тохтотуохтаах. Чугас дьонун, төрөппүттэрин, аймахтарын доруобуйаларын туһунан саныахтаах.
Билигин өрөспүүбүлүкэ үрдүнэн саҥа үөрэх дьылыгар бэлэмнэнии үлэтэ күүскэ бара турар. Балаҕан ыйын 1 күнүгэр оҕолор үгэскэ кубулуйбут көрүҥүнэн үөрэхтэрин саҕалыахтаахтар. Өрөспүүбүлүкэ үгүс оскуолалара номнуо бэлэм тураллар, сорохторго өрөмүөн үлэлэрэ бараллар. Быйылгы үөрэх дьылыгар оскуолаларга санитарно-эпидемиологическай быраабылалар күүскэ тутуһуллуохтара. Ол курдук, кылаастарга оҕо ахсаанын аҕыйатыахтара, бэйэни харыстанар сириэстибэлэри ирдиэхтэрэ уонна көрүдүөрдэргэ салгыны ыраастыыр тэриллэр туруохтара.
-
0
-
0
-
0
-
0
-
0
-
0
