Уопсастыба

Куонкуруска Дьокуускай куораттан, Мэҥэ Хаҥалас, Уус Алдан, Амма, Таатта, Чурапчы, Сунтаар, Мииринэй, Бүлүү улуустарыттан бииртэн биир талба талааннаахтар кытыннылар. Холобур, Бүлүү улууһун Тыымпытын дьоно «Байанай» үҥкүүтүн, кыргыдайдар чабырҕах, сыдыбыллар олоҥхо бэлэмнээн аҕалбыттар.

Түмүк биэс араас көрүҥүнэн таһаарыллан, норуот ырыаларыгар уонна олоҥхоҕо «Амма чэчирэ» ансаамбыл (сал. Сахаяна Харитонова), норуот үстүрүмүөннэригэр Сунтаар Элгээйититтэн «Чөмчүүнэ» ансаамбыл (сал. Анна Чярина), саха үҥкүүтүгэр Бүлүү Тоҕуһуттан «Айар Тоҕус» ансаамбыл (сал. Сардаана Николаева, Зоя Евсеева), уус-уран кэпсээн жанрыгар Уус Алдан Бороҕонуттан «Чуораана» ансаамбыл (сал. Екатерина Парникова, Диана Гаврильева) бастаатылар. Кыайыылаахтар уонна бириистээх миэстэҕэ тиксибиттэр бары Бэлиэ сурук, бириис тутан үөрэн-көтөн, «Сырдыкка, кэрэҕэ тардыһан» өрөспүүбүлүкэтээҕи иккис куонкуруска аны биэс сылынан көрсүөх буолан тарҕастылар.

Үҥкүү-битии, ырыа-тойук аргыстаах бэртээхэй дьоро киэһэни «Үрүччэ» ансаамбыл төрүттэммит историятын, сайдан испит түһүмэх кэмнэрин кэпсиир видеоматырыйааллар көстүбүттэрэ тэрээһин ис хоһоонун ситэрэн-хоторон, байытан биэрдэ.

– «Үрүччэ» үлэтин видеоҕа устан үйэлэргэ хаалларбыттарын улахан экрааҥҥа көрдөрбүттэрэ көрөөччүлэри уонна ансаамбылга араас сылларга дьарыктамыт хас да көлүөнэ дьону олус сэргэхситтэ. Манна бэйэлэрин оҕо эрдинээҕилэрин көрөн, урукку дьоллоох оҕо сааһы санатыһыы буолла, – дэһэллэр Розалия уонна Дмитрий Ивановтар.

– Лена Ивановнаҕа уонна кини хамаандатыгар барҕа махталбытын тиэрдэбит. Тэрээһиҥҥит үрдүк таһымнаах. Оҕолорбут үөрэн-көтөн, өссө да кыттар баҕалаах, кынаттанан бардылар. Маннык үрдүк таһымнаах күрэхтэһиилэри ыыта тураргытыгар баҕарабыт. Кэлэн иһэр саргылаах Саҥа дьылынан эҕэрдэлиибит! – диир Бүлүү улууһун Чочу нэһилиэгин олохтооҕо Г.Ф. Егорова.

Оттон Уус Алдан улууһун бэрэстэбиитэллэрэ маннык эттилэр:

– «Үрүччэ» салайааччыларыгар, билиҥҥи уонна урукку сыллардаах иитиллээччилэригэр ис сүрэхтэн тахсар истиҥ эҕэрдэбитин Уус Алдантан ыытабыт. Тэрийээччилэргэ маннык киэҥ далааһыннаах, элбэх оҕону хаппыт, үчүгэй куонкуруһу (өссө босхо!) тэрийэн ыыппыккытыгар улаханнык махтанабыт. Элбэх үлэ ыытыллыбыт. Инникитин үрдүк дабайыылары, ситиһиилэри, дьон-сэргэ махталын ыла тураргытыгар баҕарабыт.

Мария Афанасьевна 1937 сыл ыам ыйын 3 күнүгэр Үөһээ Бүлүү улууһугар Хоро нэһилиэгэр күн сирин көрбүтэ. Ийэтэ Прасковья Андреевна үлэ стахановеһа, аҕата Афанасий Семенович сэрии, үлэ бэтэрээнэ, Бүлүү куоратын бочуоттаах олохтооҕо этэ. Орто оскуола кэнниттэн Бүлүүтээҕи педучилищены 1962 с. бүтэрэн, куорат базовай оскуолатыгар үлэтин саҕалаабыта. Кэтэхтэн үөрэнэн, 1981 с. Магаданнааҕы пединституту бүтэрбитэ. Учуутал быһыытынан айымньылаах үлэтигэр дьүөрэлэһиннэрэн, үөрэнээччилэригэр төрүт сахалыы өйү-санааны, мындыр билиини сайыннарбыта. 1988 с. үөрэтэр кылааһын оҕолоругар фольклор куруһуогун тэрийбитэ кэлин «Үрүччэ» оҕо образцовай ансаамбыла буола сайдыбыта.

«Үрүччэ» амсаамбылы билигин Туйаара Колесова салайа сылдьар, кини оскуолаҕа үөрэнэр сылларыгар эмиэ бу амсаамбылга дьарыктанан улааппыта. Онон Мария Афанасьевна олохтообут үгэһэ утумнанар, салҕанар.

Хаартыскалары ааптар хааччыйда