Уопсастыба

Уус Маайа бөһүөлэгэр, Норуот айымньытын уонна бодоруһуутун култуурунай киинигэр ураты харыйа дьэндэллибит – араас өҥнөөх саптарынан баайыллан оҥоһуллубут! Аттыгар эмиэ сабынан баайыллыбыт икки табалаах.

Бу кэрэни Саха Өрөспүүбүлүкэтин култууратын туйгуна, Уус Маайа улууһун народнай маастара Прасковья Неустроева салайар «Оч.умелые ручки» холбоһук уран тарбахтаахтара оҥорбуттар. Прасковья Васильевна Норуот айымньытын уонна бодоруһуутун култуурунай киинигэр уус-уран самодеятельность кыттыылаахтарын көстүүмнэрин тигэр, оҥорор, бэлэмниир мастарыскыайга сэбиэдиссэйдиир. Түбүктээх үлэтигэр дьүөрэлээн, бөһүөлэк Далбар хотуттарын, араас омук бэрэстэбиитэллэрин түмэн, «Оч.умелые ручки» айар холбоһугу үлэлэтэр. Ол туһунан маннык кэпсиир:

– Айар холбоһук 2016 сылтан үлэлиир. Барыта 35 кэрэ аҥаар сылдьарыттан, сүрүн састаапка 15-пит. Иистэнэбит, испииссэнэн, күрүчүөгүнэн баайабыт, оҕуруо анньабыт, оҕуруонан, сабынан уонна «холодный фарфор» диэн матырыйаалынан араас киэргэллэри, сувенирдары оҥоробут. Икки дьүөгэбит, Алена Невская, Оксана Выборкова, улуус таһымнаах норуот маастардара буола үүннүлэр. Ити курдук маастарга үлэлэһээччи элбэх. Бөһүөлэкпит уонна улууспут ыытар уопсастыбаннай үлэлэригэр көхтөөхтүк кыттабыт. Аһымал аахсыйаларыттан туора турбаппыт. «Үтүө санаа харыйата» аахсыйа чэрчитинэн, сыллата Саҥа дьылы көрсө харыйа оонньуурдарын оҥорон, уһуйааннарга бэлэхтиибит. Оҕо оонньуура куттала суох буолара ирдэнэринэн, фетры уонна фоамираны туттабыт. Оскуола оҕолоругар, улахан дьоҥҥо күрүчүөгүнэн, спицанан баайарга, араас сувенирдары оҥорорго уонна иистэнэргэ маастар-кылаастары ыытабыт. Саас ахсын бөһүөлэкпит тулатынааҕы тыаны ыраастыыбыт. Былырыын Таптал искибиэригэр сибэкки арааһын олордон, сайын устата көрбүппүт-истибиппит.

Иллэрээ сыл, Саха Өрөспүүбүлүкэтин 100 сылын чэрчитинэн, ити сыл өссө улууспут 90 сыллаах үбүлүөйүн бэлиэтээбиппит, сахалыы кыбытык тигии ньыматынан, эбэҥкилии оһуордары киллэрэн, 180 см усталаах, 160 см туоралаах паннону оҥорбуппут. 

Былырыын Сицилияҕа, Сан-Пьеро-Патти хомууна маастардара куорат сүрүн харыйатын күрүчүөгүнэн баайан оҥорбуттарын туһунан видео интэриниэти толорбутун өйдүүргүт буолуо. Ону көрөн бараммыт, олус уустуга суох эбит, киһи син сатыыһы диэн, боруобалыырга санаммыппыт. Онон Алена Невская, Оксана Выборкова, Анастасия Прибылых, Наталья Давыдова, Варвара Хатылаева, Инна Сергина, Татьяна Бурцева, Инна Акиева, Анна Ковлекова, Марианна Архипова уонна мин сыл устата хас биирдиибит дьоҕус кээмэйдээх түөрт муннуктары баайан оҥорбуппут уонна олору түмэн холботолообуппут. Биллэн турар, ким тугу буларынан буолан, саппыт араас: шерсть, акрил, кашемир, синтетика.

Үлэбит түмүгэ 2,5 миэтэрэ үрдүктээх, түгэҕинэн эмиэ соччо эргимтэлээх харыйа буолан таҕыста. Ый саҕаланыытыгар көрдөрүүгэ туруорбуппут. Улууспут дьоно-сэргэтэ бэркэ сэҥээрдилэр, сэргээтилэр. Харыйа аттыгар турар табаларбытын былырыын оҥорбуппут. Биир таба Кытай оҥоһуга этэ, ону үтүгүннэрэн иккис табаны бэйэм оҥорбутум. Эмиэ күрүчүөгүнэн кыракый ковриктары оҥорон баран холботолоон, бүрүйбүппүт. Силигин ситэрэн, харыйа оонньуурдарын быыстапкалаатыбыт.

Саҥа дьылынан, саҥа дьолунан!

Хаартыскалары Прасковья Неустроева хааччыйда.