Уопсастыба

Үбүлүөй үөрүүтүн үллэстэ нэһилиэк олохтоохторун таһынан, Дьокуускайтан, улуус кииниттэн уонна нэһилиэктэртэн  элбэх ыалдьыт, ол иһигэр Ил Түмэн дьокутаата, «Өлүөнэтээҕи өрүс пароходствота» ПАУо генеральнай дириэктэрэ Сергей Ларионов, Уус Маайа улууһун баһылыга Александр Азаров, Саҥа технологиялар үнүстүүттэрин үөрэтэр-методическай салаатын начаалынньыга Саргылаана Попова, улуус дьокутааттарын Сэбиэтин бэрэссэдээтэлэ Егор Винокуров, улуустааҕы үөрэх управлениетын начаалынньыга Лилия Мильченко, Саха Өрөспүүбүлүкэтин үтүөлээх артыыһа, эбэҥки төрүт култууратын сырдатар-тарҕатар Валентин Исаков, Анал байыаннай дьайыы кыттыылааҕа, улуус Сэбиэтин дьокутаата Александр Миронов, оскуоланы араас сылларга бүтэрбит дьоннор, үлэлээбит учууталлар кэлбиттэр.

Үбүлүөй оскуола иитэр-үөрэтэр кэлэктиибэ уонна үөрэнээччилэрэ Николай Колесов тылларыгар, Василий Бачьев матыыбыгар «Дорогие наши Эжанцы» диэн ырыаны холбоһуктаах хуорунан толорууларынан саҕаланна.

Ил Түмэн дьокутаата, «ЛОРП» ПАУо генеральнай дириэктэрэ Сергей Ларионов, улуус баһылыга Александр Азаров уо.д.а. оскуола үөрүүлээх үбүлүөйүнэн эҕэрдэлээн тураннар, иитэр-үөрэтэр үлэ бастыҥнарыгар судаарыстыба уонна тустаах биэдэмистибэлэр наҕараадаларын, эҕэрдэ суруктарын, сыаналаах бэлэхтэрин туттардылар.

Саха тылын уонна литературатын учуутала Лидия Попова  оскуола историятын сырдатар баай матырыйааллаах, элбэх хаартыскалардаах, ахтыылардаах бэртээхэй кинигэни оҥорон, «Дани Алмаз» кинигэ кыһатыгар бэчээттэппит.

Саха Өрөспүүбүлүкэтин үтүөлээх артыыһа, Уус Маайа улууһун бочуоттаах олохтооҕо, эбэҥки төрүт култууратын сырдатар-тарҕатар Валентин Исаков  бэйэтэ суруйбут эбэҥкилии нимнгакаанын сахалыы тылбаастаан таһаарбытын үөрэммит оскуолатын бибилэтиэкэтигэр бэлэхтээтэ.

Өр сыллар усталарыгар оскуолаҕа дириэктэрдээбит, «Бочуот знага» уордьан туһааннааҕа Афанасий Скрыбыкин сырдык аатыгар анаммыт өйдөбүнньүк дуосканы оскуола дириэктэрэ Мария Афанасьева уонна Афанасий Константинович төрөппүт кыыһа Наталья Винокурова арыйдылар. Эһэтин үлэтин-хамнаһын туһунан 10-с кылаас үөрэнээччитэ Богдан Скрыбыкин кэпсээтэ, бииргэ үлэлээбит кэллиэгэлэрин, салайааччыларын туһунан араас сылларга учууталлаабыт  Мария Афанасьева, Агафья Винокурова, Надежда Прокопьева ахтыы оҥордулар.

Үбүлүөйдээх кылаас чаастарыгар оскуоланы араас сылларга бүтэрбит дьоннор кылаастарынан арахсан, үөрэнээччилэри кытары көрүстүлэр, бэйэлэрин үөрэммит кэмнэрин, үөрэппит учууталларын уонна оскуола оччолорго үгэстэрин тустарынан истиҥ-иһирэх тылларынан сэһэргээтилэр. Оҕолорго чэгиэн-чэбдик доруобуйаны, үөрэххэ, үлэҕэ ситиһиилэри баҕардылар. 

Эдьээн оскуолатын үлэтин-хамнаһын туһунан урукку сылларга видеоҕа уһуллубут киинэни иитэр-үөрэтэр үлэ бэтэрээнэ Василий Бачьев аныгы сыыппара технологиятыгар көһөрбүтүн көрдөрүү үбүлүөй биир кэрэхсэбиллээх түгэнэ буолла. Сааланы толору мустубут дьоннор ааспыт оҕо саастарын эргитэн, билигин суох буолбут учууталларын көрөн долгуйдулар.

Евсей Лугинов, Уус Маайа.

Хаартыскаҕа ааптар түһэриилэрэ