Ааспыт сууккаҕа Саха сирин үрдүнэн эбии 44 киһи коронавируска сутуллубут. Ол иһигэр, Дьокуускайга – 20, Мииринэйгэ – 4, Алдаҥҥа, Нерюнгрига, Үөһээ Бүлүүгэ – 3-түү, Мэҥэҕэ, Горнайга – 2-лии, Ньурбаҕа, Өлөөҥҥө, Тааттаҕа, Хаҥаласка, Сунтаарга, Уус Алдаҥҥа, Ленскэйгэ – биирдии саҥа ыарыһахтар көстүбүттэр.
Ольга Балабкина санитарнай сулууспалар уонна улуустар суһал штабтара, быраастара ыарыыга сыстыбыт дьон алтыспыт дьонун барыларын номнуо быһаардылар диэн иһитиннэрдэ. Оттон ыалдьыбыт дьону барыларын хайыы үйэ эмтээн саҕалаабыттарын кэпсээтэ.
Ону таһынан суһал штаб салайааччытын солбуйааччы Өлөөн улууһун Дьилиҥдэ нэһилиэгин балаһыанньатын туһунан туспа официальнай иһитиннэриини оҥордо. Санатан эттэххэ, ааспыт сууккаҕа социальнай ситимнэргэ Дьилиҥдэ дьонун өрөспүүбүлүкэ салалтатыгар уонна “Ил Түмэн” Судаарыстыбаннай Мунньаҕын дьокутааттарыгар көрдөһүү суруга тарҕаммыта. Ол курдук, дьон ыраах бөһүөлэккэ коронавирус күүскэ тарҕанан эрэрин долгуйан туран суруйбуттар этэ.
– Аччыгый бөһүөлэктэргэ ыарыы олус түргэнник тарҕанар. Ону биһиги Нам улууһун Салбаҥ нэһилиэгин холобуругар илэ көрбүппүт. Баара-суоҕа 2 күн иһигэр бөһүөлэк улахан дьоно бары кутталлаах балаһыанньаҕа киирбиттэрэ.
Билигин социальнай ситимнэринэн Өлөөн улууһун Дьилиҥдэ нэһилиэгэр эмиэ тыҥааһыннаах балаһыанньа үөскээбитин туһунан иһитиннэрии күүскэ тарҕанна. Онно мин официальнайдык уонна тоһоҕолоон этиэхпин баҕарабын. Дьилиҥдэ балаһыанньата билигин күүстээх хонтуруолга сылдьар. Улууска быраастар анал биригээдэлэрэ үлэлиир. Ону сэргэ улуус киин балыыһата ыарыһахтары эмтииргэ туох баар бары оборудованиенан, эминэн хааччыллыбыта. Онон наадыйар дьоҥҥо барыларыгар кэмигэр тустаах көмө оҥоһуллуо, – диэн Ольга Балабкина үөскээбит балаһыанньаны чопчулаата.
– Балаҕан ыйын 1 күнэ чугаһаата. Оттон өрөспүүбүлүкэҕэ коронавируска балаһыанньа биир тэҥ уустук. Онон төрөппүттэри барыларын үөрэх дьылын этэҥҥэ саҕалыырбытыгар көмөлөһөллөрүгэр, балаһыанньаны өйдүүллэригэр, туох баар бары санитарнай-эпидемиологическай ирдэбиллэри тутуһан оҕолорун үөрэххэ бэлэмнииллэригэр ыҥырабыт. Итини таһынан устудьуоннар үөрэхтэригэр туспа тохтуохпун баҕарабын. Бастакы куурустар эрэ “очно” үөрэниэхтэрэ. Атын куурустар бары үөрэхтэрин кэтэхтэн олорон салҕыахтара. Балаһыанньа хайдах буоларын балаҕан ыйын бүтүүтэ көрүөхпүт. Ол кэннэ эмиэ үөрэх салгыы хайдах буолара чопчуланыа, – диэн Ольга Балабкина иһитиннэрдэ.
-
0
-
0
-
0
-
0
-
0
-
0
