Анал байыаннай дьайыыга кыттыбыт, кытта сылдьар Светлайдааҕы техникум устудуоннарыгар анаммыт өйдөбүнньүк күн тэрилиннэ. Онно бөһүөлэк олохтоохторо, техникум устудьуонара, преподавателлэрэ сааланы толору муһуннулар.
Бочуоттаах ыалдьыт, АБДь кыттыылааҕа А.С. Севастьянов мустубут дьоҥҥо Анал байыаннай дьайыы суолтатын, Ийэ дойду ыҥырыытынан тиийэн, олохторун толук уурбут хорсун буойуттар, биир дойдулаахтарбыт, тустарынан кэпсээтэ.
Анал истиэндэҕэ Ийэ дойду иһин олохторун толук уурбут буойуттар мэтириэттэрэ уурулунна. Бу киэһэ кинилэр сырдык кэриэстэригэр анаан элбэх хоһоон ааҕылынна, ырыа ылланна.
Преподавателлэр дьоруой буойуттар техникумҥа үөрэммит кэмнэрин туһунан долгутуулаах ахтыылары оҥордулар:
– Өрүү истиҥ мичээрдээх, билиигэ-көрүүгэ тардыһар, патриот санаалаах эдэркээн устудьуон уолаттар биһиги сүрэхпитигэр мэлдьи тыыннаахтар, кинилэр умнуллубаттар, – дэстилэр.
Мустубут дьон хорсун буойуттар сырдык кэриэстэригэр саҥата суох сөҥөн турдулар. Бу өйдөбүнньүк киэһэтэ эдэр ыччаттарга, техникум устудьуонарыгар, дьоруойдары кэриэстээһин буоларын таһынан, эйэлээх олоҕу сыаналыыр итиэннэ Ийэ дойдуну харыстыыр, араҥаччылыыр наадатын өссө төгүл өйдөттө.
Сүрүн библиотекарь Туйаара Габышева «Биһиги бииргэбит!» диэн волонтердар тэрилтэлэригэр 30 тыһыынча солкуобай харчыны туттарда.
– Бу харчы биһиги библиотекабыт ЦУД (Центр удаленного доступа) өрөспүүбүлүкэтээҕи куонкуруһугар ситиһиилээхтик кыттан ылбыт бирииһэ буолар, ону анал байыаннай дьайыыга сылдьар биир дойдулаахтарбытыгар көмөнү оҥорорго анаан биэрэбит, – диэтэ.
Түмүккэ эбии үөрэхтээһин педагога Раиса Толмачинская окуопаҕа туһаныллар испиискэлэри оҥорууга маастар-кылаас ыытта.
Хаартыскалары ааптар хааччыйда
-
1
-
0
-
0
-
0
-
0
-
0
