Судаарыстыбаннай Дуума Бэрэссэдээтэлэ Вячеслав Володин үрдүк үөрэххэ, идэтийбит эбии үөрэхтээһин кыһаларыгар уонна билим тэрилтэлэригэр үөрэнэр дьахталларга хат буолууга уонна оҕо төрөөһүнүгэр көрүллэр босуобуйа кээмэйин үрдэтэр туһунан сокуон барыла оҥоһуллубутун туһунан иһитиннэрдэ. Саҥа сокуон барыла Судаарыстыбаннай Дуума Дьиэ кэргэн көмүскэлин, аҕа, ийэ буолуу уонна оҕо аймах боппуруостарын кэмитиэтин көрүүтүгэр бэриллибит. Көҕүлээһиҥҥэ төлөбүрү ийэ буолаары сылдьар дьахтар олорор эрэгийиэнигэр олохтоммут үлэлиир кыахтаах нэһилиэнньэ тиийинэн олорор таһымыгар тиэрдэргэ этиллэр.
– Сокуон барыла Бэрэсидьиэн сорудаҕын олоххо киллэрии чэрчитинэн оҥоһулунна уонна биһиги ураты чорботор докумуоммут буолар. Оҕо күүтэр ийэлэри, оҕолоох эдэр ыаллары өйүүр наада. Кинилэр олохторун уйгутун тупсарыы биһиги сүрүн сорукпут. Оҕолоох ыаллар, ол иһигэр элбэх оҕолоох ыаллар ахсааннара элбиэхтээх. Биһиги норуоппутун харыстааһын итинтэн саҕаланар, бу – судаарыстыбабыт сайдыытын, Күүстээх Арассыыйа тирэҕэ буолар, – диэтэ Вячеслав Володин.
Онон, үөрэнэр дьахталларга хат буолууга уонна оҕо төрөөһүнүгэр көрүллэр босуобуйа кээмэйэ 90 202 солк буолуоҕа диэн быһаарыы сурукка этиллэр. Билигин ити босуобуйа истипиэндийэ кээмэйинэн (23 000 солк) бэриллэр. Бу туһунан Судаарыстыбаннай Дуума саайта иһитиннэрэр.
-
0
-
0
-
0
-
0
-
0
-
0
