«Уһук Илин уонна Забайкалье» диэн парламент ассоциацията 1995 сыллаахха муус устарга тэриллибитэ. Кини үлэтэ-хамнаһа Уһук Илиҥҥи федеральнай уокурук эрэгийиэннэрин социальнай-экэнэмиичэскэй сайдыыларын харгыстыыр уопсай кыһалҕалары биир сүбэнэн быһаарарга, парламеннар икки ардыларыгар бииргэ үлэлээһини бөҕөргөтөргө, кинилэр салайар-тэрийэр кыахтарын көдьүүстээхтик туһанарга туһаайыллар. Парламент ассоциациятыгар Арассыыйа Федерациятын Уһук Илиҥҥи уонна Забайкальетааҕы субъектарын судаарыстабыннай былааһын 11 сокуону таһаарар (бэрэстэбиитэллээх) уоргана киирэр.
Биробиджаҥҥа ыытыллыбыт уочараттаах мунньахха барыта 14 социальнай суолталаах боччумнаах боппуруос көрүлүннэ. Ол иһигэр, тулаайах оҕолору олорор дьиэнэн хааччыйыы, хаарбах туруктаах дьиэлэртэн дьону көһөрүү, Анал байыаннай дьайыы байыастарыгар уонна кинилэр диэн кэргэттэригэр оҥоһуллар өйөбүллэр, биэнсийэ, хотугу собуос дьаһалларын үбүнэн (бүддьүөт кирэдьиитинэн) хааччыйыы тула киэҥ кэпсэтии таҕыста. Федеральнай былаас толоруулаах уонна сокуону оҥорор уорганнарыгар киллэриллэр этиилэр барыллара дьүүллэһилиннэ. Сүрүн дакылааттары Уһук Илин эрэгийиэннээҕи парламеннарын бэрэстэбиитэллэрэ оҥордулар диэн Ил Түмэн пресс-сулууспата иһитиннэрэр.
-
0
-
0
-
0
-
0
-
0
-
0
