Минерализованнай балаһалары уонна баһаары утары аппалары оҥоруу былаана 33 % эрэ толоруллубут. Алдан, Булуҥ, Эдьигээн, Кэбээйи, Муома, Өймөкөөн, Орто Халыма, Эбээн Бытантай улустарыгар үлэ төрүт да саҕалана илик. Сунтаарга, Ньурбаҕа, Нерюнгрига, Хаҥаласка көрдөрүү намыһах, 15 %.
– Баһаартан сэрэхтээх буолуу дьаһалларын тэрийиини түргэтэтэр, ордук чуолаан, ити улуустарга күүһүрдэр наада. Бу үлэни прокуратураны кытыннаран туран, хонтуруолга ыларга көрдөһөбүн, – диэтэ Ил Дархан.
Баһаартан сэрэхтээх буолуу кэмэ саҕаланыаҕыттан төһө да элбэх ойуур баһаара регистрацияланнар, ааспыт сылга тэҥнээтэххэ, уот хаппыт сирин иэнэ кыра эбит. Бу сарсыардааҥҥы чахчынан, Томпо улууһун Развилка сэлиэнньэтиттэн 47 км сиргэ 5 гектар иэннээх тыаҕа уонна Дьааҥы улууһун Эһэ Хайа сэлиэнньэтиттэн 31 км сиргэ 2 гектардаах тыаҕа уот турбута бэлиэтэнэн, бохсулуннулар. Нэһилиэнньэлээх пууннарга куттал суоһаабат. Былырыын баччаларга 86 300 гектар тыаны хаппыт 35 баһаар бэлиэтэммитэ.
-- Уот турар кутталлаах кэмэ саҥа саҕаланна. Халлаан куйаардаҕына, сэрэҕи күүһүрдэр наада, – диэтэ Айсен Николаев.
Салгыы сааскы халааны утары үлэ түмүгэ көрүлүннэ. Быйыл көмүөл мууһа сүрүннээн этэҥҥэ ааспыт, муус Өлүөнэ, Дьааҥы, Индигир уонна Халыма өрүстэр төрдүлэригэр тиийбит, арай, Алдан өрүскэ хара уу кэлиитэ ыксата сылдьан баран, кэмигэр дьаһал ылыллан, улахан кутталы үөскэппэтэх.
– Халаантан куттал суох буолуутун тэрийиигэ үтүө суобастаах үлэлэрин иһин муниципальнай, өрөспүүбүлүкэтээҕи сулууспалар, ЫББМ уонна метеосулууспа үлэһиттэригэр махтанабын. Холобур, Орто Халыматааҕы суһал бөлөх ыам ыйын 20-23 күннэригэр харыы тахсар кутталлаах сирдэригэр 11 төгүл мууһу дэлби тэптэрэн, куораты уу ыларыттан быыһаата, – диэтэ Айсен Николаев итиэннэ аны билигин уу алдьатан ааспыт суолун-ииһин оҥорор соругу туруорда.
Бу туһунан Ил Дархан уонна Бырабыыталыстыба пресс-сулууспата иһитиннэрэр.
Хаартыскаҕа Андрей Сорокин, ЯСИА түһэриитэ.
-
0
-
0
-
0
-
0
-
0
-
0
