«Якутскэнерго» ПАУо Киин электрическэй ситимнэрин исписэлиистэрэ уот ситимин эбийиэктэрин тас дьайыыттан алдьатыы кыһалҕатыгар болҕомтолорун эмиэ уураллар. Бу сырыыга быһылаан Хаҥалас улууһугар туһанааччылары уотунан хааччыйыы кэһиллиитигэр тиэртэ.
Балаҕан ыйын 15 күнүгэр Мохсоҕоллоох бөһүөлэгэр судаарыстыбаннай нүөмэрэ суох «Тойота» массыына суоппара анкернай тирэххэ кэтиллибит. Буруйдааҕы кытта быраабы араҥаччылыыр уорганнар үлэлэһэллэр. Энергетиктэр түргэнник чөлүгэр түһэрэр үлэни саҕалаабыттар.
«Якутскэнерго» санатта: уот ситимин эбийиэктэрин алдьаппыт буруйдаахтар сокуон иннигэр эппиэттииллэр.
Ыстараабы таһынан, буруйдаах инфраструктураны чөлүгэр түһэрии ороскуотун толуйар, ону тэҥэ туһанааччыларга барбатах уот иһин компенсациялыыр эбээһинэстээх.
Бүгүҥҥү күҥҥэ тас дьайыыттан тахсыбыт урукку түбэлтэлэринэн буруйдаах дьон хоромньуну 754 640 солкуобай сууманы төлөөбүттэр.
“Суоппардары уонна тэрилтэлэр бэрэстэбиитэллэрин энергия эбийиэктэрин таһыгар олус сэрэхтээх буоларга ыҥырабыт. Уот ситимин хараанныыр зонатыгар электричество хаһаайыстыбатын куттала суохтук туһаныыны кэһэр ханнык баҕарар маневрдэр уонна үлэлэр бобуллаллар. Ханнык баҕарар үлэлэр уот ситимин тэрилтэтин кытта сөбүлэһиллиэхтээхтэр”, -- диэн “Якутскэнерго” МАХ ханаалыгар суруйар.
Ордук кутталлаахтарынан алдьаммыт боруобаттар буолаллар: сытар боруобат 8–10 миэтэрэ мэҥҥэ «хаамыы күүрээнин» үөскэтэр — манна түбэстэххэ, боруобакка быһаччы да таарыйбакка, уокка оҕустарыахха сөп. Тиэхиньикэ туок ааһар чаастарыгар таарыйдаҕына, электрическэй доҕуһуол (электрическая дуга) үөскүүр куттала баар: бу суоппар олоҕор кутталы үөскэтэр, маны сэргэ уотунан хааччыйыы улаханнык быстыытыгар тиэрдиэн сөп.
Хаартыска: «Якутскэнерго» ПАУо МАХ ханаалыттан
-
0
-
0
-
0
-
0
-
0
-
0
