Мэҥэ Хаҥалас улууһуттан кэлбит «Манчаары оонньууларын» Уотун Уотун ыспарсымыаннар, үтүө көмөһүттэр, куорат олохтоохторо көрүстүлэр. Факел эстэпиэтэтин үөрүүлээх сиэрэ-туома Оонньуу тыынын биэрэр бэлиэ эрэ буолбакка, олохторун өрөспүүбүлүкэҕэ физическэй култуура уонна спорт сайдыытыгар анаабыт дьону чиэстиир сыаллаах ыытыллар. Ол курдук, Дьокуускай куорат факелистара: Саха Өрөспүүбүлүкэтин физическэй култууратын уонна успуордун үтүөлээх үлэһитэ, Чөл олох хамсааһын лиидэрэ, үгүс сүүрүү, оонньуу, ол иһигэр «Азия оҕолорун» уонна «Манчаары оонньууларын» көхтөөх кыттыылааҕа уонна тэрийээччитэ Дмитрий Горохов, Саха Өрөспүүбүлүкэтин успуордун маастара, 3000 уонна 5000 миэтэрэ дистанцияларга өрөспүүбүлүкэ экс-рекордсмена Екатерина Драгунова, Саха Өрөспүүбүлүкэтин физическэй култууратын уонна успуордун туйгуна, өрөспүүбүлүкэ күрэхтэһиилэрин хас да төгүллээх призера, физкултуура учуутала, «Азия оҕолоро» эстэпиэтэ кыттыылааҕа Владимир Тордуянов, уһуну сүүрүүгэ Саха Өрөспүүбүлүкэтин успуордун маастара, чэпчэки атлетика сүүрүүлэрин тэрийээччи, үлэ бэтэрээнэ Владимир Находкин, психиатр-быраас, норуоттар икки ардыларынааҕы марафоннар кыттыылаахтара, Maya.run сүүрүүктэр түмсүүлэрин тэрийээччи, уопсастыбаннай диэйэтэл Александра Мохначевская, успуорт бэтэрээнэ, 50+ категорияҕа марафоҥҥа Европа чөмпүйүөнэ, элбэх титул хаһаайката, экстремальнай марафоннар кыттыылаахтара, Саха сирин успуордун тыынын, тулуур-дьулуур бэлиэтэ Валентина Доргуева "Манчаары оонньууларын" Уотун чиэстээхтик туттулар.
Үөрүүлээх тэрээһиҥҥэ Уот эстэпиэтэтин салайааччы Дмитрий Горохов тыл эттэ уонна саха норуотугар үгэс күүһүн, күрэс төрүт көрүҥнэрин суолтатын санатта. Өрөспүүбүлүкэ аатыттан официальнайдык бэриллибит Уоту Дьокуускай куорат баһылыгын солбуйааччы Владимир Аржаков ылла.
Салгыы XXII "Манчаары оонньууларын" Уотун Манчаары Баһылай аатынан өрөспүүбүлүкэтээҕи успуорт национальнай көрүҥнэрин киинин үлэһиттэрэ көрүстүлэр. "Манчаары оонньууларын" сүрүн бэлиэтэ бэс ыйын 29 күнүгэр диэри Успуорт национальнай көрүҥнэрин киинигэр туруоҕа. Ол кэнниттэн Үс Хатыҥҥа Туймаада Ыһыаҕын чэрчитинэн ыытыллар Дыгын Оонньууларын түмүктүүр чааһыгар барыаҕа.
Манчаары Оонньууларын Уота саха дьонун сомоҕолоон, успуорка, чөл олоххо кыттыыны көҕүлээн, айанын салҕыыр.
Иһитиннэрии уонна хаартыска: t.me/ckmodun
-
3
-
0
-
0
-
0
-
0
-
0
