Бэс ыйын 16 күнүгэр Ытык Күөлгэ ОДьКХ уонна энергетика миниистирэ Вячеслав Емельянов, бу министиэристибэ сүрүн инженерэ Владимир Бондарь, «Якутскгеология» тэрилтэ салайааччыта Владимир Архипов, «Экосистема Якутии» ХЭТ салайааччыта Валерий Чукоров, «Роспотребнадзор» салаатын исписэлииһэ Наталья Борисова кэлэн үлэлээтилэр. Кинилэр бөһүөлэк скважиналарын үлэтин билистилэр уонна улуус баһылыга Айаал Бурцевка мунньахтаатылар.
Күнүстэн киэһэ улуус баһылыга Айаал Бурцев, кини бастакы солбуйааччыта Руслан Захаров, Таатта улууһун прокурорун э.т. Дмитрий Васильев Чөркөөххө тутулла турар модульнай тииптээх успуорт саалатын тутуун хаамыытын билистилэр. Үлэ кыраапык быһыытыан ыыталларын көрдүлэр. Саала атырдьах ыйыгар үлэҕэ киириэхтээх.
«Тааттавтодор» тэрилтэ айан суолугар 2 км. 400 м усталаах суол учаастагын өрөмүөннүү сылдьар.
Салгыы Саһыл Уйалаах ипподромугар Амма, Чурапчы, Үөһэ Бүлүү, Нам улуустарын тренердэрэ, ат баайааччылара «Тааттаавтодор» генеральнай дириэктэрэ Иван Бочонины кытта сүбэ мунньаҕы ыыттылар. Онно ат сүүрүүтүн өрөспүүбүлүкэтээҕи федерациятын толорооччу дириэктэрэ Татьяна Капылова, федерация бэрэстэбиитэлэ Эдуард Рехлясов кытыннылар. Оонньууларга биэс дистанцияҕа (1600 м., 2400 м. – кэлии ыраас хааннаах, 1600 м., 2400 м. -- ыраас хааннаах Саха сиригэр төрөөбүт, 7000 м. – саха атын сүүрдүү) барыта 60 ат сүүрэрэ күүтүллэр.
Оробуочай сырыы түмүгүнэн, саала тутуута тэтимирдэргэ, ипподромҥа эбии үлэни ыытарга быһаарылынна.
Хаартыска: ааптар түһэриитэ.
-
2
-
0
-
0
-
0
-
0
-
0
