Бу икки сыл иһигэр «Точка кипения» былаһааккатыгар 600-тэн тахса тэрээһин ыытыллыбыт. Онно барыта 18 тыһыынчаттан элбэх киһи кыттыбыт.
--Биһиги өрөспүүбүлүкэбит курдук киэҥ-далай сиргэ соннук улахан соруктаах эрэ олоруох тустаахпыт. Саха сиригэр тус көрүүлээх, хорсун санаалаах, саҥаны арыйарга баҕалаах, айар-тутар дьоҕурдаах, ылсыбыт дьыалаларыгар эппиэтинэһи сүгэр ыччаттар олус наадалар. Кинилэри өйүүбүт, сайдалларыгар кыаҕы биэрэбит. Холобура, бу «Точка кипения» оннук көхтөөх дьону түмэр, айарга-тутарга көҕүлүүр. Икки сыл иһигэр бу сайдар эйгэбит идэтийбит уонна уопсастыбаннай түмсүүлэри сомоҕолуур кииҥҥэ кубулуйда. Манна өрөспүүбүлүкэ сайдар суолун тобулаллара, кэскилин түстүүллэрэ кэрэхсэбиллээх. Салгыы үүнэн-сайдан иһиҥ! -- диэн биһирээн эттэ Ил Дархан Айсен Николаев.
«Точка кипения» киэбинэн Арассыыйаҕа элбэх былаһаакка үлэлиир. 2015 сылтан саҕаламмыта. “Агентство стратегических инициатив” диэн тэрилтэ сүрүннүүр.
Бу үөрүүлээх тэрээһиҥҥэ РФ Бэрэсидьиэнин цифровой уонна технологическай сайдыы боппуруостарыгар бэрэстэбиитэлэ, «Платформа НТИ» кэмиэрчэскэйэ суох тэрилтэ генеральнай дириэктэрэ Дмитрий Песков кыттыыны ылла:
--Дьон маннык бэйэтэ тобулан таһаарар бырайыактара, аһаҕастык кэпсэтии, санааны үллэстии олоҕу уларытар саамай сөптөөх быһаарыныылары ылынарга тоҕоостоохтор. Тоҕо диэтэххэ, манна бүрүкүрээтийэ диэн суох, көҥүл айар-тутар эйгэ буолар. Өссө да суолталааҕы айыҥ-тутуҥ!
“Точка кипения” экспертнэй-коммуникационнай былаһааккаҕа сыл устата элбэх урбаанньыт, уопсастыбаннай түмсүү, айар бөлөх, научнай-чинчийэр тэрилтэ, судаарыстыбаннай уорган үлэһиттэрэ кэлэн, бырайыактаах ыччаты кытта көрсүбүттэрэ, сүбэ-ама биэрбиттэрэ, бииргэ үлэлэһэргэ ыҥырбыттара, өйүүллэрин биллэрбиттэрэ.
-
0
-
0
-
0
-
0
-
0
-
0
