Муома улууһун Индигиир нэһилиэгин Буор Сыһыы сэлиэнньэтигэр нэһилиэк дьаһалтатын, актыыбын уонна олохтоох сэбиэт дьокутааттарын кытары көрсөн, халаан содулун туоратар, кыстыгы көрсөр үлэ хаамыытын билистилэр. Халаантан эмсэҕэлээбит ыалларга сылдьан, чөлүгэр түһэрии үлэтэ хайдах баран иһэрин, туох көмө оҥоһуллубутун көрдүлэр-иһиттилэр. Түөрт ыалга харчынан көмөлөрүн, 30-туу тыһыынча солкуобай харчыны, туттардылар. Бу харчыны норуот дьокутааттара халаантан эмсэҕэлээбиттэргэ анаан хомуйбуттара.
Нэһилиэнньэни кытары көрсүһүүгэ олохтоохтор хортуоппуйунан уонна оҕуруот аһынан хааччыйыы быйыл хайдах тэриллэрин туһунан ыйыттылар. Сүөһүлээх-сылгылаах ыаллар ходуһалара ууга баран, кыстыыр отторун кыайан хааччымматахтарын туһунан эттилэр. Анал орто уонна үрдүк үөрэх кыһаларыгар үөрэнэр оҕолоох төрөппүттэр устудьуоннар истипиэндьийэ ылалларыгар итиэннэ уопсайга киирэллэригэр көмөлөһөргө көрдөстүлэр.
Бэҕэһээ уонна бүгүн норуот дьокутааттара Абый улууһугар үлэлээтилэр. Майыар национальнай нэһилиэгэр, Кэбэргэнэ сэлиэнньэтигэр, итиэннэ улуус киинигэр, Белай Гора, бөһүөлэгэр сырыттылар. Олохтоох дьаһалтаны, дьокутааттары уонна нэһилиэнньэни кытары көрүстүлэр, чөлүгэр түһэрии, кыстыкка бэлэмнэнии үлэлэрин билистилэр, эмсэҕэлээбит ыалларга көмөлөрүн туттардылар. Бу туһунан Ил Түмэн пресс-сулууспата суруйар.
Хаартыска: Ил Түмэн саайтыттан.
-
0
-
0
-
0
-
0
-
0
-
0
