Уопсастыба

Оскуоланы бүтэрээт, пиэрмэҕэ ыанньыксыттаабыта. Бастыҥ ыанньыксыт Анна Марковна такайыытынан отделение биир бастыҥ ыанньыксыта буолубта, «Бэтилиэккэ эдэр гвардееһа» бэлиэнэн наҕараадаламмыта. Биһиги кылаастан биир бастакынан Никандр Семеновка эргэ тахсан, күн бүгүнүгэр диэри харыс да халбарыйбакка Сиэйэ сис ыала буолан ньиргийэн олороллор. Тиэргэннэрэ араас тутуунан толору: дьиэ, баанньык, бэкээринэ, маҕаһыын, хотон, бэсиэккэ , тэпилииссэ... Үс уол оҕоҕо күн сирин көрдөрдүлэр. Эдэр ийэ футболлаан, лапталаан оҕолорун кытта сүүрэрэ, дьиэлэрин иһигэр аһыыр остуолларыгар кинигэлэри туора ууран баран теннистээн тэйэллэрэ, ый-хай бөҕөтүн түһэрэллэрэ, уоскуйан дуобаттыыллара.
Сиэйэ буокса, көҥүл тустуу сайдыбыт сирэ. Ларисалаах, Никандр оҕолоро төрүү эт-хаан өттүнэн сайдыылаах, бэрээдэккэ аҕалара кыра эрдэхтэриттэн такайбыт буоланнар бары тустуунан дьарыктанан, үһүөн көҥүл тустууга успуорт маастардара. Ол тусталларыгар саамай ыалдьааччылара – ийэлэрэ Лариса Афанасьевна. Тустуу албастарын, ол албастар ааттарын кини саамай билэрэ буолуо диэтэххэ омун буолбат.

Килиэп -- тыын суолталаах аһылыкпыт. Ыһыллыы-тоҕуллуу сылларыгар Сиэйэҕэ бээкэринэ сабыллан, килиэби атын дэриэбинэттэн ылларыы ордук тиэхиньикэтэ суох, кырдьаҕас дьону ыараханнык таарыйбыта. Бу кыһалҕаны көрө сылдьан, Лариса Афанасьевна 2016 с. дьоҕус бэкээринэни арыйан үлэлэппитэ. Оччолорго 50-нун ааспыт, сүөһүлээх-астаах ыал ийэтигэр бу улахан таһаҕас этэ эрээри, нэһилиэгин дьонун туһугар ылсан, «Ларыыса килиэбэ дуо?» дэтэр минньигэс килиэби астаан, Сиэйэ таһынан чугастааҕы Түбэй, Түбэй Дьаархан нэһилиэктэрин хааччыйан олорор. Күннэтэ сүүсчэкэ бухааҥканы буһарар.
Оҕо эрдэҕиттэн тиэхиньикэҕэ сыстаҕас. Аан бастаан дьиэ тастыы олорбут Кимка мотороллерун миинэ, ыыта үөрэммитэ. Онтон ыла араас мааркалаах матассыыкылы барытын ыыта үөрэммитэ. Арай, 60 сааспытын туолан баран, Сунтаар киинигэр ыы муннубутунан анньыһа түстүбүт, киһим үгэһинэн сатаарыччы күлбүт уонна чугас эргин бары истэрбит курдук: «Мин права ыллым», -- диэн үөйбэтэх өттүттэн үөрүүтүн үллэһиннэ. Онтон ыла Лариса уруултан түспэт автоледи. Онон доҕоттоор, массыына ыытар үөрэнэргэ, быраабы ыларга хаһан да хойут буолбатах.

Ларисалаах Никандр сэттэ ыанньыктаахтар. Этинэн-үүтүнэн бэйэлэрин, оҕолорун дэлэччи хааччынан олороллор. Үс уоллаах ыал сиэринэн, кийииттэрин кыргыттарын курдук истиҥник кэпсииллэрэ истэргэ олус үчүгэй. Кийииттэр элбэх сиэни бэлэхтээн, эбэлээх эһэлэрин үөрдэллэр. Дьүөгэм сааһыран истэҕин аайы талаана тахсан, дьарыга элбээн иһэр. Ат симэҕин оҥорон, араас чаппараахтарынан дьиэтин симээбит, хоруоҥканан киэргэтэн дьэрэкээн үтүлүктэри, суумкалары, бэргэһэлэри тигэн эдьиийдэригэр, балтыларыгар, кийииттэригэр бэлэхтиир. Бу дьикти дьарыкка кинини бииргэ үөрэммит кыыспыт, норуот маастара Варвара Федорова уһуйар эбит, инньэ гынан тоҕо да чугас олорботохпут буолла диэн ыраахтар хомойобут. Өссө кэрэни кэрэхсиир буолан, Сиэйэ кэрэ айылҕатын хаартыскаҕа түһэрэн, дьиэтин, маҕаһыынын киэргэтэн дьонун, атыылаһааччыларын үөрдэр.
Сыанаттан түспэт ырыаһыт, үҥкүүһүт, бүтүн үс нэһилиэги минньигэс килиэбинэн хааччыйан олорор биэкэр, Саха Сирин суон сурахтыыр үс бухатыыр тустууктары ииппит ийэ, «Сунтаар улууһун сайдыытыгар киллэрбит кылаатын иһин» бэлиэ хаһаайката, кэрэни кэрэхсиир саха Далбар Хотуна, Лариса Афанасьевна Семеноваҕа Айхал!