Уопсастыба

– Күндү оҕолор, исписэлиистэр этэллэринэн, айылҕаны кэтээн көрүү биэс сүрүн төрүөттээх. Бастатан туран, айылҕа киһини үтүө санаалаах буоларга, бэйэ-бэйэҕэ хардарыта көмөлөсүһэргэ, оттон айылҕа көстүүлэрин кэтээн көрүү тулалыыр олоҕу сыаналыырга үөрэтэр. Иккиһинэн, өйү-санааны сайыннарар – эһиги айылҕаны, тулалыыр эйгэни кэтээн көрөҥҥүт чахчылары хомуйар, тэҥниир, ырытар, түмүктэри оҥорор үөрүйэхтэри иҥэринэҕит, толкуйдуур дьоҕургутун сайыннараҕыт. Үсүһүнэн, айылҕаны төһөнөн чинчийэн, билэн-көрөн иһиэххит даҕаны, соччонон кинини харыстыыр, араҥаччылыыр буолуоххут. Төрдүһүнэн, айылҕа араас эйгэтин кэтээн көрөҥҥүт, эһиги бэйэҕит иэйиигитин, быһыыгытын-майгыгытын ордук үчүгэйдик өйдүөххүт. Бэсиһинэн, айылҕа уонна тулалыыр эйгэ дьикти кэрэлэрэ, хатыламмат уратылара эһигини саҥа саҕахтарга, билии киэҥ эйгэтигэр угуйуохтара, айар уонна чинчийэр үлэҕэ кынаттыахтара. Күндү доҕоттоор, өйдөөҥ: айылҕаны таптааһын диэн олоҕу таптааһын буолар, оттон ол – бу Сиргэ баары барытын тутан турар улуу күүс, – диир Александр Герасимов.

«Күннүгү» оскуола алын кылааһын үөрэнээччилэрэ төрөппүттэрин кытары дьиэ кэргэнинэн, сорохтор учуутал, кылаас салайааччытын сүрүннээһининэн кылааһынан уонна бөлөҕүнэн, оттон үрдүкү кылаас оҕолоро бэйэлэрэ толороллор. Үгүстэр айылҕаны кэтээн көрүүгэ дьиэҕэ баар судургу матырыйаалларынан араас прибордары оҥостон туһаналлар. 

Эппиппит курдук, быйыл «Күннүк» уон биирис төгүлүн тахсар. Кэлэр 2026 сыллаах «Күннүккэ» күн-дьыл туругун, салгын температуратын, тыал хайысхатын, салгын баттааһынын уонна сөҥүү түһүүтүн күннэтэ кэтээн, ону таһынан бэлиэ күннэринэн (көтөр соҕуруу барыыта, бастакы хаар түспүт күнэ, кыстык хаар түспүт күнэ о.д.а.) сыл устата толоруллар. Биир сирэй күнү-дьылы кэтээн көрүү болдьохтоох бэлиэлэригэр, табылыыссаны толоруу холобуругар анаммыт. Онон саҥа саҕалыыр биитэр уруккутун умнубут оҕо итинэн сирдэтэн толороро табыгастаах буолуоҕа.
Биир сирэй Саха Өрөспүүбүлүкэтин каартатыгар анаммыт, манна оҕо төрөөбүт-үөскээбит улууһа хас сыллаахха төрүттэммитин, нэһилиэнньэтин ахсаанын, ол иһигэр төһө оҕо оскуолаҕа үөрэнэрин бэлиэтиир. Биллэн турар, онуоха кини анал матырыйаалы хасыһан билиитин-көрүүтүн хаҥатар. Ону таһынан, куйаар-куодунан киирэн, улуустарынан күн-дьыл туругун билсэр.

Ый хаамыыта уонна Зодиак бэлиэлэрэ
Акыйаан уута Ый дьайыытыттан түллэр уонна уостар, киһи организмын 70 %-а ууттан турар буолан, ол киһи туругар эмиэ сабыдыаллыыр. Ити иһин, ый үүнэр кэмэ араас тэрээһиннэри оҥорорго, кэпсэтиилэри ыытарга, эмтэнэргэ, оттон ый эргэтэ саҕаламмыты ситэрэргэ ордук табыгастаах эбит.
Ый халандаарын оҕуруотчуттар ордук көдьүүстээхтик туһаналлар. Үгүстэн биир холобуру санаттахха, ый үүнэр кэмигэр сиэмэни буорга баттыыр, ый бүтүүтүгэр төрдүгэр астаахтары олордор идэлээхтэр. Ый Сири тула 29,5 күн устата эргийэр итиэннэ Зодиак бары бэлиэлэринэн ааһар. Дьэ ити иһин «Күннүккэ» Ый хаамыытын уонна Зодиак бэлиэлэрин кытары алтыһыыта киллэриллибит.  

Сиэрдээх сыанабыл
Үөрэх уонна билим министиэристибэтэ итиэннэ Экология, айылҕаны туһаныы уонна ойуур хаһаайыстыбатын министиэристибэтэ 2018 сылтан саҕалаан, «Күннүгү» толорууга өөрспүүбүлүкэтээҕи куонкуруһу тэрийэллэр. Онно сыллата 300-тэн тахса оҕо кыттан, номинацияларынан араас бириистэргэ тиксэн үөрэллэр-көтөллөр. Онон, ааптардар истиҥник махтанан тураннар, 2024 сыллаах куонкурус кыайыылаахтарыгар уонна кинилэр салайааччыларыгар, бириистэри туруорбут дьоннорго туспа сирэйи анаабыттар.
Мэлдьи баар балаһалары байытаннар, ааптардар сыллата саҥа чахчылары киллэрэллэр. Ол курдук, былырыыҥҥы таһаарыыга Өймөкөөн чулуу сылгыһыта экстремал-айанньыт Дугуйдаан Винокуров Москубаҕа уонна Сэйимчээҥҥэ айанын туһунан чахчылары сырдаппыттара. Быйыл өрөспүүбүлүкэбит 12 бөдөҥ өрүһүн туһунан сибидиэнньэлэри киллэрбиттэр. Олору олохтоох фотографтар түһэрбит хаартыскалара ситэрэн биэрбит. «Күннүк» тас өттүн Арассыыйа Худуоһунньуктарын сойууһун чилиэнэ Федосий Заровняев дьыл түөрт кэмин дьүһүйэн оҥорбут хартыыналара киэргэппиттэр.

«Күннүк» киин куоракка «Книжнай маркет» маҕаһыыннарыгар баар, элбэҕи ылааччылар 8 914 2373088, 8 964 428124 төлөпүөннэринэн билсиэхтэрин сөп.