Аны сайын, от ыйын 4-6 күннэригэр манна Олоҥхо ыһыаҕа ыһыллар. Онон Бырабыыталыстыба Бэрэссэдээтэлин солбуйааччы, Олоҥхо ыһыаҕын тэрийэр хамыыһыйа бэрэссэдээтэлэ Сергей Местников, Ил Түмэн Бэрэссэдээтэлин бастакы солбуйааччы, Олоҥхо иккис Уон сылын тэрийэн ыытар Национальнай кэмитиэт бэрэссэдээтэлэ Александр Жирков, култуура уонна духуобунай сайдыы миниистирэ Афанасий Ноев сэтинньи 14-15 күннэригэр Кэбээйигэ үлэлээтилэр.
Улуус салалтатын кытары мунньахтаатылар, сырыы-айан, куттал суох буолуутун хааччыйыы, дьону түһэрии, аһатыы, түһүлгэни оҥоруу боппуруостарын тула кэпсэттилэр, эбийиэктэри көрдүлэр.
Ол кэнниттэн түүн оройугар диэри, 7 чаас устата, «Муҥха олоҥхото» бэстибээл кыттааччыларын иһиттилэр. Эдэр толорооччуларга салалта өттүттэн итинник болҕомтолоох сыһыан, биллэн турар, бу дьарыктарын өссө суолталыылларыгар, утумнаахтык дьарыктаналларыгар күөртүүр күүс буолбута чахчы. Күөн күрэскэ барыта 15 биирдиилээн толорооччу уонна Бүлүү Тааһаҕарыттан «Харатаай Баһылай ыччаттара» бөлөх кытынна. Итинтэн 12 кыттааччыта – Култуура уонна ускуустуба Аартыкатааҕы үнүстүүтэ, Национальнай бибилэтиэкэ, Олоҥхо ассоциацията тэрийэр «Олоҥхолоох айан: Ноо!» десант чилиэннэрэ.
Дьүүллүүр сүбэҕэ «Муҥха олоҥхото» бэстибээли төрүттээбит Зоя Сысолятина, кини идиэйэтин өйөөн, сүбэ-ама буолар бэрэпиэссэр Галина Попова-Санаайа, Олоҥхо кииниттэн Елена Протодьяконова уонна Ульяна Флегонтова үлэлээтилэр. Түмүккэ финалга үс толорооччу таҕыста – үһүөн олоҥхолоох айаммыт кыттыылаахтара. 2023 с. Олоҥхо ыһыаҕын ыччакка кыайыылааҕа Марфа Аммосова (Мэҥэ Хаҥалас) «Ыллам ырыалаах толорооччу» ааты ылла. Быйыл Нерюнгрига ыытыллыбыт Олоҥхо ыһыаҕын, «Саха» НКИХ «Олоҥхо баттл-2023» күрэҕин муҥутуур кыайыылааҕа Станислав Иванов (Мэҥэ Хаҥалас) «Бастыҥ толорооччу» буолла. Муҥутуур кыайыылааҕынан Прасковья Прокопьева (Хаҥалас) ааттанна. Кини «Хаҥалас Боотур» олоҥхону толордо.
Кэбээйи улууһун баһылыга Иван Левин тэлэбиисэр бирииһин туттарарыгар: «Национальнай бибилэтиэкэ саайтыгар киирэн, ити олоҥхо кинигэтин онлайн арыйан олорон, тэҥҥэ аахтым. Ис хоһоонун уларыппакка, наһаа үчүгэйдик кылгатар эбиккит. Ол эмиэ үлэ буоллаҕа», -- диэн хайҕаата.
Кэбээйи Сииттэтин кулуубун үлэһитэ Афанасий Гуляев: «Кэбээйи эдэр ыччатыттан олоҥхоҕо мин эрэ холонон көрөбүн. Кыттааччылары көрөн-истэн сөхтүм. Олоҥхолуурга маастар-кылаас ылбыт тэҥэ буоллум. Аны мантан ыла Олоҥхо ыһыаҕар улууһум аатын түһэн биэрбэт гына бэлэмнэниэм», -- диэтэ.
Муҥха олоҥхото хайдах муҥхата суох буолуой? Олоҥхолоох айанньыттар, Ынах Булуҥа диэн эбэҕэ муҥхаҕа нырыыһыттаан, дойдуларыгар илии тутуурдаах кэллилэр.
Хаартыскаҕа: М.Эверстов-Соргу түһэриилэрэ.
-
1
-
0
-
0
-
0
-
0
-
0
