“Ити хаарта судаарыстыбаннай уонна муниципальнай төлөбүрдээх уонна төлөбүрэ суох өҥөлөрү биир тиһиккэ холбуоҕа уонна билиҥҥитэ үлэлии турар социальнай чэпчэтиилэргэ туһуламмыт сыһыарыылары кытта биир систиэмэлээх буолуоҕа.
Социальнай хаарта чэпчэтиилэринэн туһанарга идентификатор быһыытынан туһаныллыаҕа, ону сэргэ бырагыраама партнердарыттан өрөспүүбүлүкэ иһигэр уонна таһыгар табаарга уонна өҥөҕө чэпчэтиилэри биэриэҕэ.
Өрөспүүбүлүкэ салалтатын сорудаҕынан СӨ Үлэҕэ уонна социальнай сайдыыга министиэристибэтэ социальнай хаарта бырайыагын концепциятын бэлэмнээтэ. Онон бүгүн министиэристибэлэри, сайдыы институттарын, IT хампаанньалары, бааннары уонна устудьуоннары кытта стратегическай мунньаҕы ыыттыбыт. Бу көрсүһүүгэ концепция уонна бырайыак тула сайдыы боппуруостарын дьүүллэстибит.
Маннык бырайыактар Арассыыйа атын эрэгийиэннэригэр хайыы үйэ олоххо киирбиттэрэ. Холобур, Приморьеҕа “Приморец”, Москваҕа “Карта москвича” диэн социальнай хаарталар үлэлииллэр. Онон бу сылга Саха сиригэр бырайыагы олоххо киллэрэн саҕалыахпыт диэн эрэнэбин.
Маны таһынан, социальнай хаарта официальнай логотибын уонна аатын толкуйдааһыҥҥа куонкурс биллэриэхпит. Онно Саха сирин хас биирдии олохтооҕо кыттар кыахтаах. Онон сэргэх идиэйэлэри күүтэбит!” – диэн Андрей Владимирович балаҕан ыйын 23 күнүгэр саҥа бырайыак туһунан кылгас суруйууну инстаграм сирэйигэр таһаарбыт.
-
0
-
0
-
0
-
0
-
0
-
0
