Оробуочай сырыы бэбиэскэтэ балачча киэҥ. Ол курдук, олунньу 12 күнүгэр саха парламентарийдара ЛНӨ Норуодунай Сүбэтин мунньаҕар кыттан, Бырабыыталыстыба чааһыгар өрөспүүбүлүкэҕэ тулалыыр эйгэ харыстабылын уонна экология өттүнэн куттал суох буолуутун эйгэтигэр анаммыт судаарыстыбаннай бырагырааманы олоххо киллэрии үлэтин хаамыытын билистилэр, эрэгийиэн таһымнаах сокуон барылларын көрүүнү иһиттилэр.
Саха Өрөспүүбүлүкэтин уонна Луганскай Норуодунай Өрөспүүбүлүкэ парламентарийдарын бииргэ үлэлээһиннэрэ ордук уустук боппуруостары, тирээн турар кыһалҕалары быһаарарга, Анал байыаннай дьайыыга сылдьар байыастарга өйөбүлү оҥорорго, холбоспут эрэгийиэннэргэ көмөнү тэрийэргэ, олохтоох салайыныы тиһигин сайыннарыыга тирэх буолар. Саха Өрөспүүбүлүкэтэ бойобуой подразделениелары, саҥа холбоспут эрэгийиэннэри кытары үлэтэ-хамнаһа Ростов уобалаһын, Луганскай уонна Донецкай Норуодунай Өрөспүүбүлүкэлэр нөҥүө оҥоһуллар.
Алексей Еремеев уонна Александр Подголов маршал А.И. Еременко аатынан сэрии бэтэрээннэрин өрөспүүбүлүкэтээҕи госпиталыгар сырыттылар. Бааһыран, доруобуйаларын чөлүгэр түһэрэр Анал байыаннай дьайыы байыастарын уонна кинилэр төрөппүттэрин кытары көрсөн, ирэ-хоро сэһэргэстилэр, түргэнник үтүөрэллэригэр баҕаларын эттилэр. Саха Сириттэн ыҥырыллыбыт байыастар сулууспалыыр тирэх пууннарыгар дойдуларыттан илдьибит гуманитарнай кэһиилэрин туттардылар.
Санатан эттэххэ, олунньу 10 күнүгэр Ил Түмэн дэлэгээссийэтэ уонна Дон парламенын олохтоох салайыныыга кэмитиэтин бэрэссэдээтэлэ Владимир Влазнев Соҕурууҥҥу байыаннай уокурук клиническай госпиталыгар Саха Сириттэн тиийбит байыастары, волонтердары, психологтары уонна эмчиттэри кытары көрсүбүттэрэ.
Маны таһынан парламентарийдар Луганскайга Аҕа дойду дьоруойдарыгар анаммыт «Острая могила» өйдөбүнньүккэ сылдьан тыыннаах сибэккэ дьөрбөтүн уурдулар. Бу туһунан Ил Түмэн пресс-сулууспата суруйар.
Хаартыска: тустаах саайтан.
-
0
-
0
-
0
-
0
-
0
-
0
