Бу дьаһал Луганскай уонна Донецкай Норуодунай Өрөспүүбүлүкэлэрин, Ростов уонна Воронеж уобаластарын хабар «Донбасс» холбоһукка түһэрсиллибит парламеннар икки ардыларынааҕы бииргэ үлэлиир туһунан сөбүлэһии чэрчитинэн тэрилиннэ.
Онон сэһэргэһиигэ Луганскай Норуодунай Өрөспүүбүлүкэ Норуодунай Сүбэтин, Донецкай норуодунай өрөспүүбүлүкэ, Ростов уонна Воронеж уобаластарын, Марий Эл уонна Саха Өрөспүүбүлүкэтин парламеннарын дьокутааттара, Луганскай Норуодунай Өрөспүүбүлүкэ Бырабыыталыстыбатын, «Луганскай норуодунай өрөспүүбүлүкэҕэ Аҕа дойдуну көмүскээччилэр» пуондаларын, эрэгийиэн олохтоох салайыныыга уорганнарын уонна култуура тэрилтэлэрин бэрэстэбиитэллэрэ кытыннылар.
– Биһиги сорукпут аҕа көлүөнэ дьоммут хаалларбыт кырдьыктарын харыстааһын буолар. Ол биһигини личность быһыытынан сайыннарар, киһилии сиэрдээх майгы-сигили онно олохсуйар. Көлүөнэ ситимин өйөөһүн улахан суолталаах. Өскөтүн биһиги ааспыт кэм дьоруойдарын, биир дойдулаахтарбыт тустарынан ыччакка мэлдьи кэпсиир-сырдатар буоллахпытына, ким даҕаны устуоруйа чахчытын токурутуо суоҕа, – диэтэ ЛНӨ Норуодунай Сүбэтин бэрэссэдээтэлэ Денис Мирошниченко кэпсэтиини саҕалыырыгар.
Төгүрүк остуол кыттыылаахтара тустаах эрэгийиэннэригэр устуоруйа чахчыларын үйэтитиигэ, харыстааһыҥҥа, ыччатыы патриоттуу тыыҥҥа иитиигэ ыытыллар үлэ туһунан сырдаттылар. Көҕүлээһин бүддьүөтүнэн олохтоох суолталаах устуоруйа эбийиэктэрин тутуу, «Дьоруой паартата», «Өйдөбүнньүк чүмэчитэ», «Норуот киинэтэ» о.д.а. курдук патриотическай аахсыйалары, дьаһаллары тэрийии, көрдүүр үлэни өйөөһүн, сырдатар уонна култуурунай-маассабай үлэҕэ дьоруойдары тардыы, ыччат историческай уонна байыаннай-патриотическай холбоһуктарын өйөөһүн, патриоттуу иитии туһунан сокуону ырытан оҥорууга Ыччат парламенын кытыннарыы уо.д.а. тустарынан киэҥ кэпсэтии таҕыста.
– Биир идэлээхтэрбит, үлэҕит уопутун билиһиннэрбиккит иһин махтанабын, элбэх этиилэри иһиттибит, олортон сорохторун биһиги туһаныахпытын сөп эбит. Үгүс бырайыактарбыт, аахсыйаларбыт биирдиҥилэр, ити бары биир улахан дойду эрэгийиэннэрэ буоларбытын, биир устуоруйалаахпытын, биир дьоруойдардаахпытын көрдөрөр. Инникитин даҕаны бу курдук көхтөөхтүк бэйэбит духуобунай баайбытын хаҥатыһа туруоҕуҥ, уопсай өйдөбүлбүтүн харыстыаҕыҥ, – диэтэ төгүрүк остуолу түмүктүүрүгэр Денис Мирошниченко.
Бу туһунан Ил Түмэн пресс-сулууспата суруйар.
Хаартыска: тустаах саайтан.
-
1
-
0
-
0
-
0
-
0
-
0
