Саха Өрөспүүбүлүкэтин Ил Дархана Айсен Николаев эпидемиологическай балаһыанньа уустугурбутунан, 65-тэн үөһэ саастаах дьон дьиэҕэ олорууларын туһунан ыйаахха илии баттаата.
– Аҕа саастаах көлүөнэ дьон коронавируска хаптарар түгэннэрэ аһара элбээтэ. Билиҥҥитэ 51 киһи реанимацияҕа сытар. 9 киһини ИВЛ аппараакка холбоотулар, – диэн Айсен Николаев иһитиннэрдэ.
Бары билэрбит курдук, биэнсийэ кээмэйэ кыра буолан, билигин үгүс биэнсийэлээх киһи төһө кыаҕа баарынан үлэлии сатыыр. Кыра да хамнас – биэнсийэҕэ эбиискэ буолар. Саҥа ыйааҕынан, тэрилтэлэр аҕа саастаах кэллиэгэлэрин ыраахтан олорон үлэлиир эрэсиимҥэ көһөрүөхтээхтэр уонна үлэҕэ тахсарга модьуйуо суохтаахтар.
– Билигин саастаах үлэһиттэртэн элбэх үҥсүү киирэр. Сорох тэрилтэлэр биэнсийэлээх кэллиэгэлэрин үлэҕэ таһаара сатыыллар. Ити олох сатаммат быһыы. Онон 65-тэн үөһэ саастаах дьон дьиэҕэ олороллорун, үлэҕэ тахсыбаттарын туһунан ыйаахха илии баттаатым, – диэн Ил Дархан бэлиэтээтэ.
Санатан эттэххэ, бу ыйаахха быраастар хапсыбаттар. Оттон дьиэҕэ олоруу эрэсиимигэр көспүт үлэһит биэнсийэлээхтэр дьиҥ олоххо хайдах балаһыанньаҕа түбэспиттэрий? Ону бэйэлэриттэн ыйытыластыбыт.
Раиса Петрова, лаборант:
– Бырамыысыланнас тэрилтэтигэр лабаратыарыйаҕа үлэлээбитим. Муус устар ыйтан атырдьах ыйыгар диэри харантыыҥҥа олорбутум. Бастаан сыллааҕы уоппускабын биэрбиттэрэ. Онтон таах олорбутум. Балаҕан ыйын 1 күнүттэн муоста сууйааччыттан саҕалаан испэсэлиистэргэ тиийэ кырдьаҕас үлэһиттэри барыларын уураттылар. Онон билигин көннөрү биэнсийэлээх буолан олоробун. Мээнэ таһырдьа тахса сатаабаппын.
Александра Евсеева, бухгалтер:
– Кулун тутар ыйтан саҕалаан дьиэбиттэн олорон үлэлиибин. Бухгалтер буоламмын мэлдьи көмпүүтэргэ үлэлиибин. Онон барыта сатанар. Сайынын уоппускаҕа сылдьыбытым. Күһүн эмиэ ыраахтан олорон үлэбин салҕаатым. Ким да үлэҕэр таҕыс диэн модьуйа илик. Тэрилтэм салалтата балаһыанньаны өйдүүр.
Розалия Кондратьева, консьерж:
– Коронавирус арыый хаптайа сылдьыбытыгар кылгас кэмҥэ үлэбэр таһаара сылдьыбыттара. Ол иннинэ бэйэни хааччахтаныы эрэсиимин кытаанахтык тутуспутум. Мэлдьи дьиэбэр олорбутум. Билигин ыалдьыбыт дьон ахсаана эбиллэн, үлэбиттэн уурайарга күһэлинним. Куттала бэрт. Дьиэҕэ киирэр-тахсар киһи элбэх. Ким эрэ мааскалаах, ким эрэ мааската суох, ыалдьыбыт да дьон баар буолуохтарын сөп. Онон бэйэбин харыстанан дьиэҕэ олоруом. Мин оннубар арыый эдэр биэнсийэлээҕи үлэҕэ ыллылар.
-
0
-
0
-
0
-
0
-
0
-
0
