Күрэскэ Таатта, Нам, Мэҥэ Хаҥалас, Хаҥалас, Амма, Кэбээйи улуустарыттан, барыта тоҕус иис түмсүүтэ кыттыыны ылар. Сарсыарда тоҕус чааска быһа сибээһинэн күрэскэ кыттааччылары Ил Дархан уонна Бырабыыталыстыба дьаһалтатын салайааччы Георгий Михайлов, ЫБМ ГО салайааччытын солбуйааччы Яна Наумова, ыччат миниистирэ, АБДь бэтэрээнэ Петр Шамаев, урбаан, атыы уонна туризм миниистирэ, АБДь бэтэрээнэ Георгий Андреев уонна “Илии сылааһа” иис сыаҕын салайааччы Ирина Саввина эҕэрдэлээтилэр.
Ол кэнниттэн биирдиилээн хамаандалар дьааһыктарын астылар, бэс ыйын 8 күнүгэр диэри иистэниэхтэрэ. Бу туһунан Таатта улууһун “Харыстаана” иис сыаҕын салайааччыта Анна Никифорова маннык этэр:
-- Биһиги сыахпыт АБДь саҕаланыаҕыттан үлэлиир. Туһааннаах күрэскэ биир санаалаахтарбытын кытта холбоһон, тута кыттарга санаммыппыт. Бары кэриэтэ үлэлээх дьоммут, ол эрээри дойду туһугар бэриниилээх буолуу, дойдуга таптал диэн күүс биһигини арыаллыыр, сирдиир. Бу күрэскэ барыта 10 таҥаһы тигиэхтээхпит, шортиктан саҕалаан көстүүмҥэ тиийэ тигиллэр. Ирдэбилгэ таҥас размердара кытта ыйылла сылдьар. Күрэс Улуу Кыайыы олохтоммут ыйыгар тэриллибитэ эбии эппиэтинэһи сүктэрэр. Күрэс аһыллыытыгар киэн туттар биир дойдулаахтарбыт, АБДь кыттыылааҕа Алексей Уваров уонна кини аҕата, “Ворошилов” холкуос сириттэн Аҕа дойду сэриитигэр олохторун толук уурбут, кыайыы көтөллөөх эргиллибит хорсун-хоодуот биир дойдулаахтарбытын үйэтитээччи, сыллата Кыайыы күнүгэр Мэҥэ уоту уматар Алексей Митрофанович кыттыыны ыллылар. Кинилэр үтүө санаалара, бу ыытыллар күрэскэ ситиһиини аҕаллын. Түгэнинэн туһанан сыаҕым иистэнньэҥнэригэр, бу сыллар усталарыгар өйөбүл, тирэх буолалларыгар махталбын этэбин. Дьиэлэриттэн, үлэлэриттэн быыс булан, кыайыы туһа диэн иистэнэллэригэр, үлэлииллэригэр.
Бу курдук төрөөбүт дойду туһугар ис санааларыттан үлэлиир ийэлэр, эбэлэр холобур эрэ буолаллар.
Вера Канаева, Таатта
-
17
-
1
-
0
-
0
-
0
-
0
