Ил Дархан Айсен Николаев АБДь бэтэрээннэрин ассоциациятын чилиэннэрин кытары көрсүһэн, кинилэр Анал байыаннай дьайыыттан эргиллэн кэлэр буойуттар олоххо миэстэлэрин булалларын туһугар ахсаабат кыһамньыларын иһин махталын биллэрдэ.
– Анал байыаннай дьайыыттан кэлбиппэр, миигин Аһылык технологиятын өрөспүүбүлүкэтээҕи киинин салайааччынан анаабыттара. Биһиги оҕо уһуйааннарын, оскуолалары экология өттүнэн ыраас, иҥэмтиэтинэн баай, сибиэһэй олохтоох аһынан-үөлүнэн хааччыйыыга үлэлиибит, бородууксуйа хаачыстыбатын бэрэбиэркэлиибит. Холобур, бэҕэһээ Горнай улууһугар Вера Лиханова бааһынай хаһаайыстыбатын бородууксуйатын, сылгы этин, чинчийэн, үрдүк хаачыстыбалаах натуральнай аһылык буоларын өссө төгүл дакаастаатыбыт. Өрөспүүбүлүкэ хаһаайыстыбалара Анал байыаннай дьайыы байыастарын мэлдьи өйүүллэр, мин 2023 сыллаахха арҕаа тиийэн, Курскай туһаайыытынан сэриилэспитим, дойдуттан ас-үөл кэлэрэ хайдах курдук долгутуулааҕын, көмөлөөҕүн билэбин, – диэтэ Айаал Тимофеев.
Бу күннэргэ Аһылык технологиятын өрөспүүбүлүкэтээҕи киинин үлэһиттэрэ «Саллаат ийэтин сүрэҕэ» уопсастыбаннай тэрилтэ бэрэссэдээтэлэ Светлана Диодорова-Лаврентьева ыҥырыытын өйөөннөр, Арассыыйа Федерациятын Оборуонатын министиэристибэтин госпиталларыгар эмтэнэ сытар буойуттары кытары үлэлиир волонтердарга көмөнү тэрийиини көҕүлээтилэр.
– Хомуллубут ас-үөл байыаннай госпиталларга сытар байыастар түргэнник үтүөрэллэригэр улахан көмө буолуоҕа. Анал байыаннай дьайыы бэтэрээнин быһыытынан этэбин: хас биирдии саллаат, кини дьиэ кэргэттэрэ итиэннэ бааһырбыт байыастарга көмөлөһөөччүлэр бары -- дьоруойдар. Кинилэргэ өйөбүл уонна болҕомто наада. Ол эрэли итиэннэ Кыайыыга дьулууру үөскэтэр! – диэтэ Айаал Тимофеев.
Бу туһунан Ил Дархан уонна Бырабыыталыстыба пресс-сулууспата суруйар.
Хаартыска: Андрей Сорокин.
-
0
-
0
-
0
-
0
-
0
-
0
