Уопсастыба

Бастакы күн дэлэгээссийэ   «Өлүөхүмэ кыладабыайа» ХЭТ-кэ, «Поиск» кэпэрэтиипкэ уонна сортобуой учаастакка, В.Г. Пермин бааһынай хаһаайыстыбатыгар сылдьан, уу ылан ааспыт бааһыналарын, ходуһаларын көрдүлэр.
Иккис күн улуус дьаһалтатыгар нэһилиэктэр баһылыктара, хаһаайыстыбалар салайааччылара кыттыылаах сүбэ мунньах ыытылынна.  Видео кэмпириэнсийэ эрэсииминэн ыытыллыбыт мунньахха Саха Сирин тыа хаһаайыстыбатын бородууксуйатын оҥорон таһаарааччылара, норуот дьокутааттара, учуонайдар,  биэдэмистибэлэр, тэрилтэлэр салайааччылара, бэрэсэтэбиитэллэрэ кыттыын ыллыллар. Мунньахха сүрүн боппуруоһунан Өлүөхүмэ улууһугар тыа хаһаайыстыбатын сайыннарыы стратегиятын дьүүллэстилэр.   Манна биир бастакынан Өлүөхүмэ улууһун Кыыллаах нэһилиэгиттэн төрүттээх саха чулуу кыыһа, биллиилээх судаарыстыбаннай - бэлитиичэскэй диэйэтэл, Ил Түмэн хас да ыҥырыытын дьокутаата, экэниэмикэ билимин  дуоктара Зоя Афанасьевна Корнилова аатын кытта ыкса ситимнээх “Зоя Корнилова ыра санаата”  (Мечты Зои Корниловой)  норуодунай бырагыраама көрүлүннэ.    СӨ  Тыа хаһаайыстыбатын уонна ас-үөл бэлиитикэтин миниистирин солбуйааччы, тыа хаһаайыстыбатын билимин дуоктара Сахаяна Павлова  бу бырагыраама Өлүөхүмэ улууһугар агро бырамыысыланнаһы сайыннарыыга, бааһыналары чөлүгэр түһэриигэ, сүөһү аһылыгын бөҕө баазатын тэрийиигэ Зоя Корнилова уруккуттан туруорсубут ыра санаатын олоххо киллэриигэ хардыы буолар диэн бэлиэтээтэ.  

Бу норуодунай бырагыраама туһунан өссө 2025 сыл саҕаланыытыгар биллибитэ, норуокка таһаарбыттара. Онно Ил Түмэн дьокутаата Елена Голомарева көҕүлээн, салгыы өрөспүүбүлүкэ парламенын дьокутааттара Н.И. Кульбертинов уонна А.З. Колодезников өйөөннөр  «Биир Ньыгыл Арассыыйа» баартыйа бырайыагар киллэрбиттэрэ уонна  чопчу үлэни саҕалаабыттара.  Мунньахха Өлүөхүмэ оройуонун тыа хаһаайыстыбатын управлениетын  начаалынньыга  А.П. Антонов билигин өрүс эҥээр ходуһалар ууга барбыттарын, оттооһуҥҥа уустук балаһыанньа үөскээбитин иһитиннэрэн туран, инникитин Өлүөхүмэҕэ үүт-эт, оҕуруот аһын оҥорон таһаарыыга туох -ханнык кыах баарын билиһиннэрдэ. Ол курдук, 2025 сылтан ыһыы кээмэйин улаатыннарыы, бааһыналары чөлүгэр түһэрии  саҕаламмыт, улуус бэйэтин хортуоппуй сиэмэтинэн хааччыммыт. Билигин улууска 7000 ынах, 6030 сылгы, 6 тыһ тахса таба иитиллэн тураллар. «Подворье Олекмы» ХЭТ, «Саныйахтаах» ТХПК улуус киэн туттар, тэрээһиннээх хаһаайыстыбаларынан биллэллэр. «Агро бырамыысылыннай комплекс ЦРО» СХТ салайааччытын солбуйааччыта С.Н. Плотников билигин бааһына, ходуһа сирин иэнин кэлимсэ анаалыстааһын ыытыллар, ол кэннэ төһө сүөһү, сылгы, таба иитиллэрин ааҕыы оҥоһуллуоҕа, туох-ханнык мадьыаллаах хаһаайыстыбаны тэрийэри быһаарыахпытын наада диэтэ. Барыллаан көрүүнэн муниципальнай тэрилтэ ордук табыгастааҕын бэлиэтээтэ.Өрөспүүбүлүкэтээҕи тыа хаһаайыстыбатын чинчийэр билим үнүстүүтүн сүөһү аһылыгын производствотын  лабораториятын сэбиэдиссэйэ Е.С. Пестерева Өлүөхүмэҕэ сүөһү аһылыгын производстотын тэрийии кэскилин туһунан билиһиннэрэригэр термо ыскылааттары, хортуоппуйу харайар эбийиэктэри тутуу наадатын эттэ. Мунньахха үгүстэр Зоя Корнилова Өлүөхүмэ былыргыттан айылҕатын, сирин-уотун усулуобуйатынан  Саха Сирин бурдугунан, хортуоппуйунан хааччыйар улууһунан биллэр диэн туран, манна сүөһү аһылыгын производствотын бөҕө баазатын тэрийэри туруорсубутун санаттылар.

Норуот дьокутаата Елена Голомарева видео кэмпириэнсийэҕэ Дьокуускайтан кыттан, Зоя Корнилова үтүө аатын үйэтитии уонна маннык олоххо чугас бырагыраама бииргэ түмүллэн сайдыыга тириэрдэллэрин бэлиэтээтэ. «Бу олоххо чугас  «Зоя Корнилова ыра санаата» бырагыраама  тыа хаһаайыстыбатын министиэристибэтин уонна Өлүөхүмэ оройуонун кытта бииргэ үлэлээһиннэрин кытта ситимнээх. Ону кытта Өлүөхүмэ оройуонун сиригэр-уотугар сир баайын хостооһунунан дьарыктанар «Нордголд» ХЭТ үлэлэһэн эрэрэ эрэннэрэр.  Бырагыраама  «Биир Ньыгыл Арассыыйа» баартыйа Саха Сиринээҕи салаатынан өйөнөрө бырайыак тылтан дьыалаҕа киирэригэр күүс, көмө буолар. Маннык быраграамалар киэҥ дьайыылаах хамсааһыннары оҥороллор. Ол туһугар Өлүөхүмэ чулуу кыыһа Зоя Корнилова турууласпыта, сыраласпыта», -диэн Елена Христофоровна эттэ.

Бу бырагыраама өссө саҥа биллэн эрдэҕинэ, балтараа сыл анараа өттүгэр норуот дьокутаата Елена Голомарева «Кыым»  хаһыакка биэрбит интервьютугар «Зоя Афанасьевна Корнилова курдук сүдү киһи аттыгар сылдьан үлэлээбиппин, элбэҕи сүбэлэппиппин, мөҕүллүбүппүн даҕаны киэн туттабын, дьылҕабар махтанабын»,  диэбиттээх.

- “Сокуоҥҥа норуот тыына баар буолуохтаах” диэн кини ирдэбилэ, үлэлээн кэлбит суола этэ. Хайдах курдук дьоһун суолталаах, биһигини харыстыыр сокуоннары ыларга үлэлээбитий! Кини аатын үйэтитиигэ бырагыраама оҥорбуппут. Холобур, төрөөбүт Өлүөхүмэтин улууһа  улуустартан бастакынан тыа хаһаайыстыбатыгар биэс сыллаах бырагырааманы оҥоро сылдьар. Зоя Афанасьевна “Өлүөхүмэ улууһа Саха сирин барытын хааччыйар кыахтаах тыа хаһаайыстыбалаах буолуохтаах” диирэ, онно сир баайын хостооччулар көмөлөһүөхтээхтэрин, бииргэ үлэлэһиэхтээхтэрин баҕарара. Барыан иннинэ “Норд Голд” хампаанньа олохтоох салалтатын кытта көрсүһэ сылдьыбыта, ол санаатын тиэрдибитэ.  Онон ити -- туолар кыахтаах бырайыак. Биһиги ол бырагырааманы “Зоя Корнилова ырата” (“Мечты Зои Корниловой”) диэн ааттаары гынабыт. Олус үчүгэй буолбат дуо? 

Хомондьуруопкаҕа, мунньахтарга сылдьа бардахпына аҥардас олорон эрэ истибэппин, таах сылдьыбаппын, тыл эппит дьону кытта булгуччу билсэн, кэпсэтэр, ыйытар идэлээхпин. Хайа да боппуруоска исписэлиистэр, билэр-көрөр дьон, салайааччылар, учуонайдар көмөлөрө, туһалара улахан буолааччы. Онон сибээс олохтооһун --үлэбэр туттар биир “ньымам”. Холобур, күөл култууратын туһунан учуонай тыл этэр буоллаҕына, мин Кэбээйи улууһун дьокутаата буоларым быһыытынан, хайаан даҕаны кинини кытта билсэн, санаа атастаһан, сибээс олохтоон тэйэбин. З.А. Корнилова этэр буолара: “Сокуону оҥорорго булгуччу билимҥэ тирэхтээх буолуохтааххын”, -диэн бэлиэтээбитин санатыахха сөп. 

Хаартыскалар: ЯСИА, Сахапарламент