Төһө да улахан уонна элбэх баһаар, сайыҥҥы иккис долгун халаан уутун содула атахтаатар, онуоха эбиискэ уматык кырыымчыгын кыһалҕата үлэһит, отчут дьоҥҥо күчүмэҕэйдэри үөскэттэр, кыстыыр оту булар туһугар мөхсүү тохтоон хаалбакка, дьон өлүмнэһэ оттууллар. Ол сиэринэн, Өлөөн улууһун Ээйигин диэки баар Ньурба улууһун саамай уһук Хорула нэһилиэгин отчуттарын аҥаара оттоон бүтэн эрэр. Үксүлэрэ бу ый ортото бүтэр чинчилээхтэр. Быйыл нэһилиэкпит дьоно, дьэ, күөх уйгу быйаҥыттан бэркэ тииһиннилэр. Дыргыл сыттаах үрдүк хаачыстыбалаах күп-күөх от бугулларын, томточчу тапталлыбыт кээһиилэрин киһи үөрэ, сэргии көрөр. Халлаан барахсан отчуттарга туран биэрэн абыраатаҕын көр, дьэ, үөрүү! Сүөһүлэр кыстыгы бэркэ туоруохтара диэн эрэл баар буолла.
"Хорула" тыа хаһаайыстыбатын производственнай кээпэрэтиибэ (бэрэссэдээтэл Степанов Ян Ионович) билигин 60 туонна оту кээһэн, бу ый ортото 100 тонна гынан, былаанын толорор кыахха киирдэ. Чааһынайдар биир оннук түмүгү ситиһэн эрэллэр. Быйыл сайын таҥара биһиги нэһилиэккэ мичик аллайан, улаханнык маанылаабытыттан дьон-сэргэ санаата бөҕөхсүйдэ. Сирин аһын да арааһынан күндүлүүр чинчилээх: дьэдьэн, сугун, биэ эмийэ, ыт тиҥилэҕэ (княженика сибирская) бэркэ үүммүт. Онон үтүө сайын быйаҥыттан олохтоохтор үөрэ-көтө сомсоллор, кэлэр кыстыктарын оҥостоллор.
Валерий Иванов, Хорула.
Ааптар хаартыскаҕа түһэриилэрэ.
-
5
-
0
-
0
-
0
-
1
-
0
