Ол түмүгүнэн Ил Түмэн Бэрэссэдээтэлэ Алексей Еремеев санаатын маннык үллэһиннэ:
-- Кэнники сылларга бүддьүөтү көрүү ыарахаттардаах соҕус. Ол төрүөтэ биллэр. Ол курдук, дойдубут сааҥсыйаларга түбэһэн уонна аан дойду үрдүнэн бүрүүкээн турар балаһыанньаттан сылтаан уонна сиртэн хостонор сир баайыттан дохуоттанар буоламмыт кэлиҥҥи бүддьүөттэргэ ыарахаттары көрсөбүт. Ол ба буоллар, билиҥҥи тоҕус ыйдааҕы бүддьүөт түмүгүн көрдүбүт, ол түмүгэ куһаҕана суох. Сыл түмүгүнэн өссө ырытан анаалыстыахпыт. Оттон 2027, 2028 уонна 2029 сыллардааҕыны былаанныырга 2027 сыллааҕы дохуот этэҥҥэ курдук. Былырыын бастакы ааҕыыга олох кыра сууманан саҕалаабыппыт. Быйылгы 350 млдр солк. тэҥнэстэ. Быһааран этэр буоллахха, бүддьүөт бырассыаһа диэн олус уустук. Федеральнай бүддьүөтү кытта бииргэ дьүөрэлээн үлэлиибит, улуустар бүддьүөттэрин кытта эмиэ. Билигин бастакы ааҕыыга киирбит көрдөрүүлэргэ олоҕуруо суохтаахпыт. Арааһы кэпсииллэр, холобур, тыа хаһаайыстыбатыгар кыраны көрбүттэр, хоту улуустарга субсидиялаах көтүүгэ харчы көрүллүбэтэх, эминэн-томунан хааччыллыыга эмиэ. Сылтан сыл итинник буолар, тахсар. Биһиги бастакы ааҕыллыыны көрөн баран, федеральнай бүддьүөттэн кэлэр датаассыйа, субсидия, субвенция чопчуланнаҕына уонна эбии дохуоттарбытын аахтахпытына, ити тустаах ыстатыйаларга бэриллиэхтэрэ. Бүддьүөтү балаансаламмыт диэн этиэххэ наада. Судаарыстыбаннай сүрүн эбэһээтилистибэлэр толоруллуохтара. Манна бастакы уочарат хамнас, социальнай эбэһээтилистибэлэр, төлөбүрдэр, нассынаалынай бырайыактар уо.да.а киирэллэр.
-
0
-
0
-
0
-
0
-
0
-
0
