Сэтинньи 3 күнүгэр, Бүлүү куоратыгар тэриллибит дьокутааттар оройуоннааҕы Сэбиэттэрин уочараттаах 23 сессиятын үлэтигэр 23 дьокутаат кыттыыны ылла.
Дьокутааттар «Бүлүү улууһа (оройуона) муниципальнай оройуон Устаабыгар уларытыылары киллэрии» уонна «Бүлүү улууһа (оройуона) муниципальнай оройуон дьокутааттарын Сэбиэтин Регламеныгар уларытыылары киллэрии» боппуруостарын көрдүлэр.
Уларытыылар оройуон Сэбиэтин бэрэссэдээтэлин быыбарын кытта ситимнээхтэр. Ол курдук, дьокутааттар Устаапка, Регламеҥҥа бэрэссэдээтэли талыы кистэлэҥ куоластааһынын оннугар аһаҕас куоластааһынынан ыытыллар диэн уларытыыны киллэрдилэр.
Оройуон Сэбиэтин бэрэссэдээтэлин дьокутааттар бастакы тэрээһин сессияларыгар талалларын санатыахха сөп.
Даҕатан эттэххэ, улуус баһылыгын быыбара эмиэ оройуон Сэбиэтин дьокутааттарын аһаҕас куоластааһыннарынан ыытыллар.
Түмүккэ, оройуон Сэбиэтин бэрэссэдээтэлэ Гаврил Корякин «Сахатранснефтегаз» Бүлүүтээҕи филиалын салайааччытыгар, сийиэс дэлэгээтигэр Георгий Петровка Саха Өрөспүүбүлүкэтин дьокутааттарын III сийиэстэрин туһунан кинигэни үөрүүлээх быһыыга туттарда.
Ити сийиэскэ Бүлүү дьокутааттара көхтөөхтүк кыттан элбэх этиилэри киллэрбиттэрэ диэн Бүлүү улууһунааҕы Олох суола хаһыат саайтыгар биллэрэр.
Николай Куприянов
Хаартыскалар Олох суола
-
0
-
0
-
0
-
0
-
0
-
0
