«Дьокуускай бэстибээлэ куруук сайын ыытыллар эбит буоллаҕына, быйыл аан бастакытын кыһын буолар. Аан дойду араас судаарыстыбаларыттан кэлбит ыалдьыттарбыт өрөспүүбүлүкэбит кэрэтин, айылҕабыт уратытын уонна тыйыс усулуобуйаҕа олорон киинэ айар дьон үлэтин көрүөхтэрэ», — диэн киинэ бэстибээлин дириэктэрэ Алексей Егоров тоҕо кыһын ыытылларын чопчу быһааран биэрдэ.

Бу күн кыһыҥҥы бэстибээл аһыллыыга ытык ыалдьыттар, аан дойдутааҕы дьүүллүүр сүбэ чилиэннэрэ уонна саха киинэтин сулустара 75 миэтэрэ уһуннаах кыһыл көбүөрүнэн хаамыахтара. Бэстибээл дойду баһылыга Владимир Путин биллэрбит Арассыыйа норуоттарын сомоҕолоһуутун сылыгар уонна Саха Өрөспүүбүлүкэтигэр Култуура сылыгар сөп түбэһиннэрэн ыытыллар.

Көрөөччүлэр сыл саамай сэҥээриллибит киинэлэрин айааччыларын көрүөхтэрэ: «Пентхаус» киинэ хамаандатын кытта режиссёр Степан Бурнашев, бэстибээл аһыллыытын хартыыната «На краю света» режиссёра Эдуард Новиков, ону тэҥэ «Күүлэйдээ, от кэмэ», «Тойон Баай көмүһэ», «Мэхээлэчээн булчут», «Как стать боссом», «Айхал», «Чолбон», «Ыһыах» уонна «Олох түгэннэрэ» киинэлэр айар бөлөхтөрө.

Үөрүүлээх тэрээһиҥҥэ киинэ бэстибээлин дириэктэрэ Алексей Егоров уонна бырагыраама дириэктэрэ Сергей Анашкин кыттыахтара.

Биллэрин курдук, киинэ бэстибээлин куонкуруһун түмүгүнэн бастыҥ киинэлэр ааттаныахтара -  "Кыһыл көмүс хаар ачыкы" бастыҥ оонньуулаах, Арассыыйа уонна тас дойду киинэлэригэр туттарыллыаҕа. Оттон "Үрүҥ көмүс хаар ачыкы" хаһаайыттарынан бастыҥ режиссер үлэтэ, бастыҥ дьахтар оруола уонна бастыҥ эр киһи оруола диэн түһүмэхтэринэн ааттаныахтара.  

Саха Сирин айааччылара устубут киинэлэриттэн бэстибээл кыайыылааҕын көрөөччүлэр бэйэлэр быһаарыахтара. Ону тэҥэ биһиги киинэлэрбит ортотугар киинэ эпэрээтэрэ Иннокентий Аммосов аатынан бириис олохтонон турар.

Бэстибээл саамай долгутуулаах чааһын - киинэ куонкуруһун норуоттар икки ардыларынааҕы састааптаах идэтийбит жюри сыаналыаҕа. Манна Казахстаантан, Монгуолуйаттан, Кытайтан, Арассыыйаттан уонна биллэ турар Саха Сириттэн киинэ биллэр маастардара, тэлэбиидэнньэ уонна култуура диэйэтэллэрэ дьүүллүөхтэрэ.

Куонкуруһу таһынан бырагыраамаҕа анал көрдөрүүлэр: «Айтматов» киинэ аан дойдутааҕы премьерата, «Фокус: Индия» анал бырагыраама, «Хотугу Кавказ киинэтэ» анал бырагыраама, Саха сирин режиссердарын бөлөҕө устубут «Ыһыах» диэн документальнай киинэ премьерата уонна да атыттар көрөөччүлэр интэриэстэрин тардыахтара.

Киинэ ускуустубата Аассыыйа Бэрэсидьиэнэ Владимир Путин өйүүргэ ураты болҕомтотун уурар креативнай экэниэмикэтин биир кэскиллээх хайысхатынан буолар. Дойду баһылыга бэйэтин сорудахтарыгар айар индустриялары сайыннарыыны култуура эрэ суолталаах чааһын быһыытынан буолбакка, экэниэмикэ үүнүүтүн биир сүрүн ис кыаҕын быһыытынан сыаналыыр. Саха Сиринээҕи аан дойдутааҕы киинэ бэстибээлин ыытыы эрэгийиэн киинэ индустриятын сайыннарыыга, дойду киинэлэрин киэҥ эйгэҕэ таһаарыыга уонна өрөспүүбүлүкэ айар кыаҕын арыйыыга көмөлөһөр.

Хаартыска Саха гов.ру