Эрэгийиэннээҕи Бэнсийэ пуондата иһитиннэрбитинэн, 2020 сыл ахсынньы 31 күнүгэр диэри судаарыстыбаттан социальнай хабааннаах төлөбүрү ылааччылар тустаах каартаны хайаан да оҥорторуохтаахтар уонна баантан ылбыт реквизиттэрин эрэгийиэннээҕи Биэнсийэ пуондатыгар хайаан да тиксэриэхтээхтэр. Өскөтүн каарта уларыйарыгар урукку реквизит оннунан хаалбыт буоллаҕына, счет уларыйбытын туһунан тустаах биэдэмистибэҕэ иһитиннэрэр наадата суох.
Электроннай сайабылыанньаны Биэнсийэ пуондатын порталыгар тус кэбиниэккэ киирэн ыытыллар. Манна судаарыстыбаннай өҥө порталын туһаныахха эмиэ сөп. «Мир» каартаҕа биэнсийэ харчытын аһардар инниттэн порталга «Пенсии» диэн түһүмэххэ киирэн, “О доставке пенсии” пууну талан, баан реквизитин уонна Биэнсийэ пуондатын территориальнай уорганыгар сайабылыанньаны толорон ыытыллар. Итинэ тэҥэ, Элбэх хайысхалаах кииҥҥэ (МФЦ) эбэтэр Биэнсийэ пуондатын территориальнай пуондатыгар тиийэн сайабылыанньаны эмиэ биэриэххэ сөп. Ол гынан баран, коронавирус дьаҥын кэмэ буолан, төлөпүөннэригэр эрийэн, эрдэ суруттаран бириэмэ болдьотон баран тиийиллэр.
«Мир» каартаҕа көһүүгэ ыйытыылардаах буоллаххытына, Саха сиринээҕи Биэнсийэ пуондатын 8 800 600 02 98 диэн нүөмэригэр үлэ күнүгэр эрийэн билсиэххитин сөп. Тустаах исписэлиистэр барытын быһааран, сүбэлээн-амалаан биэриэхтэрэ.
- 0
- 0
- 0
- 0
- 0
- 0