«Мин санаабар, хайа да түгэҥҥэ, күн-дьыл уларыйдаҕына, кини актыыбынаһа намтыаҕа. Муус устарга-ыам ыйыгар коронавирус күүһэ-уоҕа тосту намтыах тустаах», — диэбитин ТАСС тиэрдэр.
Планета нэһилиэнньэтин улахан аҥаара коронавируһунан ыалдьыаҕа диэн сорох исписэлиистэр этиилэрин Брико саарбахтыыр. Кини санаатынан, маннык быһыы-майгы орто үйэлэргэ эрэ көстүөн сөбө. Итинник быһыыны-майгыны таһаарбат туһугар үгүс дойдулар былаастара эрдэттэн сэрэтэр дьаһаллары ылаллара көмөлөөх буолуоҕа.
Эксперт дьон ыалдьыытын туһунан дааннайдары ырытта. Ол курдук, эр дьон дьахталлардааҕар 2 төгүл чаастатык коронавируска сутуллар эбит. Ыарыыга киһи ылларымтыа буолуутугар кини хаанын группата сабыдыаллыырын туһунан дааннайдар суохтар, ол эрээри «ылларымтыа буолууну уонна ити сыстыганнаах ыарыы дьайар уратытын быһаарар» генетическэй төрүөттэр баалларын этэр.
«Бүгүҥҥү күҥҥэ (кулун тутар 23 күнүгэр) ыарыыга 171 дойду хабылынна, 14 706 киһи өлбүтэ уонна 340 тыһыынча кэриҥэ ыалдьыы түгэнэ бэлиэтэннэ. Киһи өлүүтүн ыллахха, 4,3%. Бу ыарыыга ылыллыбыт көрдөрүүттэн ити ортотунан арыый үрдүк», — диэн бэлиэтээтэ Брико, маныаха кини киһи өлүүтэ барыта ааҕыллыбатах буолуоҕун эттэ.
Кини сабаҕалыырынан, COVID-19 ыарыыттан вакцина 2020 сыл бүтүүтүгэр – 2021 сыл саҥатыгар баар буолуоҕа.
Россия исписэлиистэрэ коронавирус ыарыыттан номнуо 6 вакцинаны оҥорон таһаардылар. Билигин олору бэрэбиэркэлииллэр. Чуолаан, «Вектор» вирусология уонна биотехнология судаарыстыбаннай научнай киинэ номнуо вакциналар бастакы көрүҥнэринэн лаборатория харамайдарыгар тест оҥорор. Сабаҕалааһын быһыытынан, препараты номнуо 2020 сыл IV кыбаарталыгар үлэҕэ киллэрии кыаллыан сөп.
Бу иннинэ, кулун тутарга, учуонайдар коронавирус толору геномун быһаарбыттара. Микроскопка SARS-CoV-2 вируһу бастакы хаартыскаҕа түһэриини «Вектор» лабораторияҕа номнуо көрдөрдүлэр.
Италия, Германия, Кытай, АХШ уо.д.а. дойдулар учуонайдара вакцинаны айан таһаарыыга салгыы үлэлииллэр.
Брико билгэлээһиниттэн атын санаа эмиэ баар. Германияҕа Роберт Кох институтугар коронавирус дьайыыта улаатыаҕа диэн билгэлииллэр. Экспердэр сыстыганнаах ыарыы туруута 2 сыл устата барыаҕын, маныаха сутуллуу хас 5-с түгэнэ ыарахан буолуоҕун этэллэр.
SARS-CoV-2 вирустан төрүөттээх COVID-19 пневмония ахсынньы бүтүүтэ Кытай Ухань куоратыгар өрө турбута. Кытай тас өттүгэр ыарыы 180-тан тахса дойдуга бэлиэтэммитэ. Worldometers кулун тутар 23 күнүнээҕи дааннайдарынан, аан дойдуга барыта 349 тыһ. тахса ыалдьыы түгэнэ бигэргэтилиннэ. 15,3 тыһ. киһи олохтон барда.
Елена БАИШЕВА
-
0
-
0
-
0
-
0
-
0
-
0
