Иванна Тистяхова, Д.А. Петров аатынан Ытык-Күөл 2№-дээх орто оскуолатын 2 кылааһын үөрэнээччитэ:
— Мин дистанционнай үөрэҕи сөбүлээбэтим. Оскуолабын ахтабын. Онно дьүөгэм Валя баар, кинини көрсүөхпүн баҕарабын. Дьиэҕэ олорон үөрэнэргэ наар учуутал сорудаҕын бассааптан көрөн оҥоробут. Холобур, физкультураҕа учууталбыт Иван Федорович араас хамсаныылары, эрчиллиилэри ыытар. Ону үтүктэн дьарыктанабыт. Дьиэҕэ үлэни аҕыйаҕы биэрэллэр, тута толорон иһэбин. Саамай сөбүлээн английскай тылга, уруһуйга, үлэ уруогар уонна физкультураҕа үөрэнэбин. Эбии фортепианоҕа дьарыктанабын. Дьиэбэр үнүстүрүмүөнүм баар буолан, үчүгэй.
Ваня Муксунов, Дьокуускай куорат 31№-дээх оскуолатын 3 кылааһын үөрэнээччитэ:
— Дистанционнай үөрэх куһаҕан. Күнү быһа дьиэҕэ олоробут. Учууталбыт сорудаҕа сорох оҕолорго өйдөммөт. Учууталбыт быһаардаҕына быдан чэпчэки буолааччы. Ол иһин оскуолаҕа үөрэнэр үчүгэй. Оскуолаҕа баран үөрэнэрбит буоллар, ордук буолуо этэ. Дистанционнай үөрэххэ биир эрэ уруок буолар, оттон биир нэдиэлэҕэ үс-түөрт уруок эрэ тахсар.
Диана Кузьмина, В.Г. Короленко аатынан Амма 1№-дээх орто оскуолатын 10 кылааһын үөрэнээччитэ:
— Үөрэхпит сарсыарда 9 чаастан саҕаланар, уруок 30 мүнүүтэ барар. Zoom, РЭШ нөҥүө эбэтэр бассаабынан үөрэнэбит. Күннээҕи сорудаҕы ыыталлар. Дьиэҕэ үөрэнэр син үчүгэй. 9 чаастан үөрэнэр буолан, утуйуохха сөп, ыксаабаккын. Ол гынан баран ноҕурууска улахан – учууталлар элбэх дьиэтээҕи үлэни биэрэллэр. Ол даҕаны сибээс үчүгэй буоллаҕына. Ханнык эрэ дьиэтээҕи үлэ толоруллар болдьохтоох буолар (чаастаах, күннээх), уоттан эмиэ тутулуктаах (арыт уот барар). Миэхэ сөп курдук, ол эрээри тулуурдаах киһи тулуйуо.
Мичил Слепцов, Үөһээ Дьааҥы, 9-с кылаас үөрэнээччитэ:
— Биһиги бастаан дьиэҕэ үөрэммиппит. Онтон кэлин оскуолаҕа үөрэнэри көҥүллээбиттэрэ. Быйыл ОГЭ туттарабыт, ол иһин сирэй үөрэнэрбит табыгастаах. Мин тус бэйэм дьиэҕэ олорон дьарыктанарым ордук этэ. Интернеттээхпин. Киирэн, хантан баҕарар сорудахтарын көрөн оҥоруохпун сөп. Биһиги нэһилиэккэ коронавирус суох. Онон таһырдьа сылдьарбыт бобуллуо суохтаах дии саныыбын.
-
0
-
0
-
0
-
0
-
0
-
0
